قرار فتح المساجد ساهم فى تنشيط مبيعات سوبر ماركت.. من جاور السعيد يسعد

01:59 م | الجمعة 28 أغسطس 2020

بفرحة كبيرة استقبل صاحب سوبر ماركت فى شارع فيصل، قرار إعادة فتح المساجد بعد 5 أشهر من الاغلاق، حيث ساهم فتح المسجد المجاور لمحله فى تنشيط المبيعات بعد فترة طويلة من الركود.

يحكى محمد حنفي، 26 عاماً، صاحب المحل، أنه قبل أزمة فيروس كورونا كانت مبيعات المحل تتضاعف يوم الجمعة، حيث يخرج المصلون من المسجد لشراء احتياجاتهم، ولكن خلال الفترة السابقة انخفضت المبيعات فى ذلك اليوم بشكل كبير.

عندما علم "حنفى" بقرار إعادة فتح المساجد، توقع أن يساهم المصلون المترددون على المسجد الذى يقع إلى جواره فى تنشيط مبيعاته: "طول الفترة اللي فاتت كنت بكسل افتح المحل يوم الجمعة بسبب قلة المبيعات، الأول كان كل جمعة المحل بيبقى زحمة جداً بسبب الناس اللى داخلة وخارجة، بعدها الرِجل اتقطعت خالص ويوم الجمعة بقى اقل يوم ببيع فيه، لكن النهاردة بعد فتح المسجد للصلاة الدنيا اتغيرت خالص وبقى الناس تخرج من المسجد عليا".

عبر "حنفي" عن سعادته الكبيرة مؤكدا أن فتح المسجد جلب معه الخير كله: "الناس بتستغل يوم الجمعة عشان تخرج تشترى حاجتها بعد الصلاة، وفى فترة الاغلاق مكنش حد بيخرج خالص، الدنيا ابتدت ترجع لطبيعتها واحدة واحدة".

ولا يخفى "حنفى" قلقه مما يتردد من أنباء حول احتمال تعرض مصر لموجة ثانية من أزمة كورونا: "ربنا يسترها لأن لو الأعداد زادت تاني، المساجد هتتقفل، والمحلات كمان، وحالنا هيقف تانى".