أحمد زاهر عن دوره في مسلسل البرنس: جديد ومرهق جدا

01:38 ص | الثلاثاء 05 مايو 2020

قال الفنان أحمد زاهر، إنه يوجد ملحمة تمثيلية في مسلسل البرنس، وأن دوره في المسلسل مختلف كل الاختلاف، "مبحاولش اعمل دور في حياتي شبه التاني منذ أن بدأت العمل في التمثيل، هو دور جديد وصعب ونفسي ومرهق جداً".

وأضاف زاهر، خلال مداخلة هاتفية مع الإعلامية سارة حازم، في برنامج "مساء Dmc، المذاع على فضائية إكسترا نيوز، أن "أي ممثل في الدنيا لما يشتغل مع مخرج فنان بجد زي محمد سامي هيقدر زي اللي أنا عملته وأكتر من كده بكتير، وهو اللي مألف الورق يعني شغل النجار لأهل بيته".

وتابع، "محمد كتب حدوتة رهيبة وحوار ممثلتش في حياتي زيه قبل كده وعامل شخصيات مختلفة وكل شخصية واضحة وبطلة بدورها، وهو من أكثر المخرجين اللي اشتغل على الممثل جامد وأدواته الرئيسية هي الممثل قبل الكادرات وأي شئ، واعتماده الأول على الممثل بيشتغل عليه كويس سواء نجم أو أصغر ممثل بيقول كلمة ويمشي.

واستكمل، "عشت الدور وتقمصته وكل شوية عندما يكتب محمد سامي الورق يتصل بينا يحكيلنا هو وصل لأيه وكل شوية بجمع حاجة وبقرأ الورق كويس أوي ويعيش في الشخصية ويأخذ وقت طويل ويسترجع كل خبراته الحياتية والذاكرة الفوتوغرافية من كل المواقف التي مر بها في حياته ويختار منها أدوار ويحاول يوظفها في شخصية كل ذلك بمساعدة محمد سامي".

وأكد، أنه يتابع كل يوم التعليقات على السوشيال ميديا وأن المتابعين استخدموا جمل من المسلسل وصور وكوميكس عليه، "اللي أنا مبسوط منه أنهم كارهين فتحي وهو المطلوب، لكن مش كارهين أحمد وده اللي باسطني في الموضوع".

وأوضح، أنه يوجد عظمة في المسلسل، وأنه عند متابعتي للمشاهد ورد فعل الناس أشعر بالفخر لأنه يوجد مباراة تمثيل بين كل الممثلين من أول محمد رمضان لأصغر ممثل وواضحة جدا في اختلاف الشخصيات حتي لسان الشخصيات والجمل الحوارية فكل شخصية لها طريقة وكلام وهو شيء مبهر.