السبكي: بعض أعمالي أعتبرها "أفراح شعبية".. و"أفلامي مفهاش مشاهد بلطجة"
السبكي: بعض أعمالي أعتبرها "أفراح شعبية".. و"أفلامي مفهاش مشاهد بلطجة"
استنكر المنتج أحمد السبكي، هجوم البعض عليه، بسبب بعض الأفلام الذي يطرحها في الأعياد، والتي تحوي على رقص وأغاني، قائلًا: "أي حد يحضر فرح بيبقى نفسه محمود الليثي ييجي يغني، ودينا تيجي ترقص، أنا بعمل فرح شعبي، عشان أفرح الناس، أنا عارف إن ده مش فيلم، وده يتحسب ليا مش عليا".
وأضاف "السبكي"، خلال حواره في برنامج "شيخ الحارة والجريئة"، الذي تقدمه المخرجة إيناس الدغيدي، على شاشة "القاهرة والناس"، أنه يرفض وصف أفلامه بـ"المقاولات"، متعجبًا: "يعني أنا لما أعمل 6 أفلام أفرح بيهم الناس في العيد، يتقال عليا أفلام مقاولات، ده تاريخي 80 فيلم، ومعنديش أفلام مقاولات، ومعنديش أفلام فيها بلطجة".
وعن اتهام بعض النقاد له، بأنه سبب في دخول البلطجة لبيوت المصريين، قال: "الناس كلها بتقول عبده موته، هل ده بلطجة؟، طب هو اللي فيه بلطجة أكتر ولا إبراهيم الأبيض، ولا ده عشان مروان حامد اللي عمله مش السبكي محدش اتكلم عليه، كمية الدم اللي فيه كانت قد إيه، ليه متهاجمش، محدش جاب سيرته، هما بس يقولوا السبكي والبلطجة"، موجهًا حديثة للنقاد: "وإذا حكمتهم بين الناس أن تحكموا بالعدل".
من ناحية أخرى، علق على المشادة الكلامية واللفظ الخارج الذي تلفظ به أثناء حديثة مع الإعلامي وائل الإبراشي، في فترة سابقة، بعد انتقاد الإعلامي أحد الأعمال الذي قام بانتاجها، قال: "احنا اتصالحنا ووائل الإبراشي محترم، طبيعي بزعل لما بغلط في حد، بس اللي حصل ده مكلفنيش حاجة سواء بالإيجاب أو السلب".
