رسام جرافيتي يسجل بطولات الجيش الأبيض على جدران المحلة

10:37 م | السبت 25 أبريل 2020

«شكراً لكل واحد ما شفش الرسمة»، رسالة كتبها محمد عبيدو، رسام جرافيتى، على أحد جدران شارع شكرى القوتلى، بمدينة المحلة الكبرى، لتشجيع المواطنين على الالتزام بالحظر، وعدم الخروج من منازلهم تطبيقاً لتعليمات وزارة الصحة.

اختار «محمد» وجه طبيبة ترتدى كمامة لتكون بطل الجرافيتى، تقديراً وعرفاناً منه بالمجهودات التى يبذلها الطاقم الطبى فى سبيل القضاء على كورونا المستجد: «كل واحد له دور ورسالة المفروض بيقدمها وقت الأزمات وأنا سلاحى الرسم وأكتر حاجة بحبها وبقدمها، عشان كده قررت أرسم الجرافيتى لتشجيع الأطباء وفى نفس الوقت أشكر الناس إنها التزمت بالحظر، واخترت جملة شكراً لكل اللى ما شفش الرسمة كدليل على أن الناس قاعدة فى بيوتهم ولأول مرة مش ببقى عايز حد يشوف رسمتى».

استغرق الجرافيتى ساعات قليلة فى تنفيذه، ونجح حسب «محمد» فى توصيل رسالته، التى لاقت إعجاب المارة أثناء رسمها: «وقفوا اتفرجوا عليها واتبسطوا بيها وقالوا لى تسلم إيديك»، كما أنها أتت بصدى إيجابى أيضاً بالتزام القلة الذين كانوا يتعمدون النزول: «لاحظت إن الفكرة وصلت بعد أول يوم لرسمها، وفيه ناس كانت بتنزل ونزولها مالوش لازمة فقعدوا فى البيت»، التزم «محمد» بإجراءات السلامة الوقائية، وقام بتنظيف الجدار وتعقيمه جيداً قبل البدء فى الرسم: «كان معايا اتنين صحابى بيساعدونى وكنا بنقف على مسافات بعيدة عن بعض».