مواطنون يهاجمون داليا البحيري بعد تصريح "هديله بالشبشب": غلابة يا نجمة

01:03 م | الثلاثاء 14 أبريل 2020

هاجم رواد مواقع التواصل الاجتماعي، الفنانة داليا البحيري، بسبب تدوينة لها بشأن مخالفي حظر التجوال، على فيسبوك، والتي قالت فيها: "مبقاش أنا محبوسة في البيت أنا وأهلي داخلين على 36 يوم وزينا ناس محترمة كتير، ولو لا قدر الله حد فينا تعب مانلاقيش سرير في مستشفى عشان واحد حيوان كان مقضيها خروج بيتفسح ولا كان على باله اللي احنا فيه".

وتابعت: "حظر كامل يا ريس لو سمحت أرجوك، واللي حيقولي العمالة اليومية حديله بالشبشب على بقه أنا فاض بيا! أولا معظم المؤسسات الخيرية -وبقول معظم مش كل- بدأوا يشحتوا عليهم من قبل ما رمضان يبدأ، فمحدش يقولي مش حيلاقوا يأكلوا، وكتير منهم بنتحايل عليهم يشتغلوا أصلا طول السنة! خلينا صادقين مع نفسنا شوية كدة والنبي! واللي بيشتغلوا في مصانع على عيني وراسي يتعملهم إقامة داخل محل عملهم! غير كدة احنا رايحين في داهية".

وانهالت التعليقات الغاضبة من قبل عدد من أصحاب العمالة غير المنتظمة على تلك التصريحات عبر الصفحة الرسمية لموقع "الوطن" على فيس بوك، والتي جاءت كالتالي:-

وبتهكم، كتب حساب يدعى "Ahmed Sayed": "بنخرج وكمان بنتفسح؟"، مع وضع صورة كوميكس للفنان نور الشريف في أثناء تأديته لدور عبدالغفور البرعي بمسلسل "لن أعيش في جلباب أبي".

فيما كتب حساب يدعى "Nashwa È Mohsen": "كل الناس عايزة تقعد بس حد يصرف عليهم ويأكلهم ويجيب طلباتهم محدش غاوي يتعدى".

فيما كتب حساب يدعى "Yousuf Tantawy": "العمالة خدوا 500 جنيه، ومش كلهم ومش هيكفوا، واللي شاغلين في شركات خاصة وبينزلو هيعملوا ايه سيادتك زعلانه على حبستك".

وكتب حساب باسم "Mostafa Sayed" تعليقا على تصريحها الأخير: "حضرتك تفتكري إن العمالة اليومية بتخرج الصبح علشان تجيب فلوس تتفسح بيها بالليل".

وكتب صاحب حساب يدعى "Nona Feto": "انتي لو كان عندك تصوير كنتي هتعملي إيه؟، عل الأقل أغلب الناس نازلة تشتغل لكن، أنتي بتمثلي يعني مش بتعملي حاجة".

وكتب حساب يدعى "Ramy Mobasher": "ما انتي مش حاسة بالغلابة تضربية بالشبشب.. أحسنتي قولا".

وقال حساب باسم "Tarek Mohamad Elwzan": "أدى إهانه في حق العمالة الغلبانة، دي يتقدم فيها محضر وشكوى للنائب العام عشان تتجزا".

وقال حساب يدعى "Jolia David": "هما بتوع العمالة اليومية خارجين يتفسحو ده ربنا اللي عالم بيه".

فيما قالت "زينب ابراهيم": "إنتي محبوسه برضه، الكمبوند اللي ساكنة فيه مش بتنزلي تجري حواليه وتتريضي مشي وجري وترجعي تقعدي في الحديقة بتاعت ڤلتك، مالكيش دعوة بالغلابة العمال اللي مش لاقيين قوت يومهم سيبيهم في حالهم هما مش عارفين يدفعوا الإيجار ولا أكل ولادهم".

وكتب حساب باسم "Nashwa Gamal": "على فكرة عيب جدا، أنتي بتقولي كدة علشان معاكي فلوس تكفيكي انتي وبنتك لو قعدتي سنين في البيت؛ غيرك مش لاقي يأكل عياله والناس البيشحلهم الفلوس هما البيتفرجو عليكي وبيعملو ليكي أنتي وأمثالك سعر.. كنت بحبك يا خسارة".