أيمن بهجت قمر يهاجم إيناس عزالدين: اللي عملتيه لا بينجح ولا يشهر

فتح الشاعر أيمن بهجت قمر، النار على الفنانة إيناس عز الدين، والتي تأكد عدم إصابتها بفيروس كورونا المستجد، بعد أن تم نقلها لمستشفى الحميات بإمبابة، بعد أن ادعت إصابتها بالفيروس خلال قدومها من المغرب.

وقال قمر عبر صفحته على "فيسبوك": " أنا ماليش علاقة أن المطربة الجديدة إيناس صورت برص في المستشفى هي حرة، وده طبعا شئ محدش يقبله، أنا ماليش علاقة بارائها السياسية أو اللي بتكتبه على صفحتها، ولكن أنا اللي أذاني نفسيا إنها عيشتني في خوف على أسرتي لأنها عندي على الصفحة هنا، وكم البوستات والفيديوهات الكتير اللي أقرت فيهم بإصابتها بالمرض وكم الدعاء ليها من الناس الطيبين، وكلمات المواساة، وهي ما أنكرتش ده وماقالتش أنه اشتباه، ولما المواقع كتبت أول فنانة تصاب بالكورونا مانفتش وأنا عيشت بجد ليلة صعبة لأني حسيت إن المرض ابتدأ يدخل دايرة المحيطين بيا".

وأضاف: "تاني يوم الصبح ابتدى صحابها يكتبوا إن التحاليل أثبتت أنها مريضة بالكورونا، وشفتوا إزاي ظلمتوها وهي برضه ما انكرتش وقتها إن التحاليل لسه ما طلعتش.. لازم وقفة مع أي حد بيلعب بأعصابنا والله أعلم هي عملت كده ليه لو هتقوللي عندها أعراض أنا خدت نظرة سريعة على بعض فيديوهاتها ولقيتها ممكن تكون مزكمة عندها كحة لكن كم الفيديوهات اللي عملتها والبوستات الطويلة مش بتاعة حد عنده ضيق تنفس وصداع حاد لدرجة شكوكه ف الكورونا".

واستكمل: "كان ممكن تطلع تقول أنا شاكه أبعتولي حد.. ننتقد إن الرقم مثلا ما بيردش.. أنا بحملك كل الأذى النفسي اللي سببتيهولنا والتوتر اللي عيشتينا فيه ولازم وقفة مع أي حد يطلع يستغل الظروف والتعب النفسي اللي احنا فيه ده.. وبأمانه اللي انتي عملتيه لا بينجح ولا بيشهر.. دي تصرفات بتاخد وقتها وبتتنسي كان أبرك تعملي أغنية أنا عندي كورونا، كانت هتبقى أشرف وهتفيدك أكتر .. إخص بجد".

• أيمن بهجت قمر
• الشاعر أيمن بهجت قمر
• إيناس عزالدين
• كورونا
• فيروس كورونا
• أيمن بهجت قمر
• الشاعر أيمن بهجت قمر
• إيناس عزالدين
• كورونا
• فيروس كورونا