بالصور| "صلاح" ترك العمل بالقطاع العام "علشان مبيأكلش عيش".. واشتغل بياع "سريح"
بالصور| "صلاح" ترك العمل بالقطاع العام "علشان مبيأكلش عيش".. واشتغل بياع "سريح"
قال صلاح محمد، خريج كلية الآداب وبائع "جرابات" بمنطقة المنشية وسط الإسكندرية، "سيبت شغل الحكومة عشان الحكومة مبتأكلش عيش، ولو كنت فضلت فيها كان زماني أنا وعيالي بنام في الشارع من قلة الفلوس".
وأضاف، "مش عيب إني أسيب شغل في الحكومة، واشتغل في الشارع بياع سريح، العيب هو إني أقعد في البيت مستني فلوس تجيلي لحد عندي من الفانوس السحري".
وتابع، "الحكومة كانت بتديني في الشهر تقريبًا 400 جنيه، وده بعد ما نص الشهر يكون راح واستلفنا من كل الناس، لكن شغلي في الشارع أنا وشطارتي، ممكن اطلع في الشهر بـ 900 جنيه، غير بقى مصاريف أكلي وشربي في الشارع اللي بنزل فيه من صباحية ربنا، لحد ما الخلق كلها تروح بيوتها".
وبالرغم من الصعوبات التي يواجها في الحياة إلا أنه ملئ بالنشاط والأفكار، وقال "نفسي حد يديني قرض صغير ولو 50 ألف جنيه، أجيب بيهم ماكينة أصنع أنا الجراب اللي بيجي من الصين، واشغل معايا 30 شاب من اللي قاعدين على القهوة".
