شذى عن انتقادها بسبب مشاركتها في حملة "خليك في البيت": "هري وهبد"
شذى عن انتقادها بسبب مشاركتها في حملة "خليك في البيت": "هري وهبد"
ردت الفنانة شذى، على الانتقادات التي تعرضت لها، بسبب مشاركتها في حملة "خليك في البيت"، للتوعية بأهمية البقاء في المنازل للحد من انتشار فيروس كورونا.
وشاركت شذى، مقطع فيديو عبر عبر حسابها على إنستجرام قالت فيه: "لقيت هري وهبد على السوشيال ميديا وناس زعلانة إننا بنقول اقعدوا في البيت ويقولوا الفنانين مش حاسين بالناس واصرفوا عليهم".
وأضافت: "يا جماعة مش كل الفنانين زي اللي بتشوفوهم بيستعرضوا حاجتهم، بدون ذكر أسماء، وعندهم كام عربية وكذا فيلا، لا في فنانين عاديين جدا وأنا منهم الحمد لله".
وتابعت: "مستوايا الاجتماعي كويس بعيدا عن الشغل خالص، تقريبا مبكسبش من شغلي حاجة فظيعة، بيتي إيجار، عندي التزامات ومصاريف فإحنا لما بنقول اقعدوا في البيت فإحنا معاكم".
وأردفت: "على فكرة، أنتم مش هتقعدوا في البيت وإحنا هننطلق، علشان خاطر الوباء ده مينتشرش، فبلاش بقا موضوع ومين هيصرف ومين هيعمل.. ربك اللي بيرزقني وبيرزقك وبيرزق اللي مش لاقي شغل، وأصلا اللي هينزل يشتغل هيشتغل فين ما هو مش هيلاقي حد يشتغل معاه أو عنده، لأن الناس المفروض تقفل على بعضها".
واختتمت شذى: "بوجه كلامي للناس اللي بتكتب تعليقات مستفزة، بلاش حكاية وانتوا مش حاسين بالناس، لأن إحنا بنشتغل باليوم برضو على فكرة، إحنا لو معندناش حفلة النهاردة ولا فرح أو مسلسل إحنا مش هنلاقي ناكل، فإحنا زينا زي الأرزقي اللي بيشتغل باليومية".
