محمد رمضان يعتذر للطيار الموقوف عن العمل: تحت أمرك في أي طلب

12:42 ص | الأحد 09 فبراير 2020

أعرب الفنان محمد رمضان، عن أسفه في واقعة فصل كابتن سعد أبو اليسر من وزارة الطيران، بسبب فيديو التقط للفنان داخل قمرة القيادة، حيث قال "أنا مادخلتش كابينة الطيران بدون إذنه، أنا كنت في قمرة القيادة بس أنا مش قعدت في الكنترول، أنا مستاء جدًا من اللي حصله ووقفه عن العمل، حاجة تزعل فعلا".

وأضاف "رمضان"، خلال مداخلة هاتفية في برنامج "الحكاية"، الذي يُعرض على شاشة "MBC مصر"، مع الإعلامي عمرو أديب، أنه لم يذكر للطيار أنه يقوم بتصوير فيديو لابنه، بل كان الطيار على علم بأن هذا الفيديو سيتم نشره على السوشيال ميديا، موضحًا أنها ليست المرة الأولى حيث إن هناك الكثيرين يلتقطون صورًا تذكارية في قمرة الطائرة.

وأوضح الفنان أنه هو من طلب من قائد الطائرة أن يتلقط فيديو، قائلا "بس أنا مش شايف الموضوع مستاهل لكل ده، هل لو كان شخص غير محمد رمضان اللي قعد في المكان كان الموضوع أثار هذه الضجة شوفنا كتير من النجوم اللبنانيين وأبنائهم اتصوروا في قمرة الطائرات، أنا مش عارف إيه اللي يعوض الكابتن وأنا أعمله فورا".

رمضان عن الطيار الموقوف: "الموضوع لا يستحق هذه الضجة الكبيرة"

وتابع: "أنا زعلان ومستاء إني أكون سبب تعطيل واحد عن عمله، خاصة أن الطيار ده له تاريخ في مهنته، الموضوع لا يستحق هذه الضجة الكبيرة، أنا حاولت بالفعل التواصل مع مسؤولين في الطيران المدني، بس ده كيان محدش يقدر يتدخل في عملهم، حاولت بقدر الإمكان أفهمهم أني لا سوقت طيارة ولا عملت حاجة وأخذت فقط صورة تذكارية، وحصلت كتير، لكن الموضوع معايا بيتعمل من الحبة قبة".

وواصل: "أنا مش بقول اللي أنا عملته واللي حصل صح، بس أنا مستاء إني أتسبب في قطع عيش راجل محترم، اللي يعوض الراجل ده أنا أعمله، ولو هو محتاج أي حاجة أنا تحت أمره وبعتذر له على الهواء وبقوله أنا أسف لو كنت سبب لمشكلة ليك، لم ولن أتخلى عنه أي شيء يطلبه أنا تحت أمره، دي مش أخلاقنا إننا نتسبب في أذى حد ونسيبه، أنا راجل مولود في منطقة شعبية وصعيدي وأمي من الغربية، يعني لا ده أخلاق الصعايدة ولا الفلاحين".