وزير قطاع الأعمال: الغزل والنسيج أهم قطاع في الدولة ونهتم به بشكل خاص

11:17 م | الأحد 02 فبراير 2020

قال هشام توفيق، وزير قطاع الأعمال العام، إن الغزل والنسيج هو أهم قطاع في الدولة لما له من روافد خاصة بالزراعة وتجارة الأقطان والصناعات القائمة عليه والتي تعد كثيفة العمالة: "هو أهم قطاع في مصر، والعودة للريادة حلم وإحنا بننضف القطن والصناعة دي المفروض تتغير ويتضاف ليها مكن كل 10 سنين، وعندنا مكن المفروض يتخرد من 20 سنة وحطناه جنب المكن الجديد".

وأضاف "توفيق" خلال استضافته ببرنامج "المواجهة" والذي تقدمه الإعلامية ريهام السهلي، والمذاع على فضائية "إكسترا نيوز"، أن الرئيس عبدالفتاح السيسي يهتم بذلك القطاع بشكل مكثف منذ توليه الرئاسة، موضحا أن مصر قد وضعت على ذلك الطريق من شهر يونيو 2019 ويتم التنفيذ حاليا بتمويل معبري بلغ 9.5 مليار جنيه بضمان وزارة المالية: "فتحنا اعتماد الماكينات وفي مارس هيبدأ التركيب".

وأكد أن الفلاح المصري كان عرضه للتجار لعدم وجود المزايدات على المنتجات: "التاجر كان بيروح للمزارع في الأرض بتاعته، وإحنا قررنا نرجع تاني ونعمل مراكز حكومية منظمة لشراء القطن المصري من الفلاح، والفلاح بييجي قبل الزراعة وبنديله كيس الجوت النظيف علشان أضمن القطن اللي هيجي مش مخلوط ببوليستر أو عناصر أخرى"، مشيرا إلى أنه قد أقيم 17 مركزا إداريا لاستلام الأقطان في الفيوم وبني سويف: "سيتم فحص مبدأي وبعدين يحصل مزاد على التجار على القطن بتاعه، والفلاح بيحصل على 70% من قيمة القطن يوم المزاد، وبعدها بأسبوع بيحصل على الـ30% التانية، وكده هدي للفلاح ثقة أن وراه حكومة بتدعمه وتوفرله أكياس القطن ومراكز التجار لإقامة المزادات".

وتابع: "ده أدى إلى أن نسبة الغش اللي كانت بتصل للمحالج ومش بنشوفها في قطن الزهر قلت بصورة كبيرة جدا، ونقاء القطن اللي داخل في الحليج أحسن بمراحل من السنين اللي فاتت، والنتائج مبهرة".