"ماتغلطش غلطتي".. مواقف كوميدية ونهايات مأساوية في حكايات السفر

04:27 م | الاثنين 20 يناير 2020

في السفر نحتاج لبعض الإرشادات والخبرات التي تعلمنا ما يجب أن نتبعه أو نتجنبه خلال جولاتنا الخارجية، وهو ما دفع رواد فيس بوك، لإطلاق هاشتاج بعنوان "ماتغلطش غلطتي"، لكتابة نصائحهم لغيرهم عند السفر.

حكايات الناس مع السفر

وبدأ الكثير من الأشخاص في كتابة نصائحهم عبر الهاشتاج الذي انتشر بشكل واسع عبر فيس بوك، فنشرت "نهى" صورتها عبر حسابها، معلقة: "ما تاخدوش المحفظة اللي فيها ورقكم المصري معاكم وانتو مسافرين برا مصر، عشان أنا بعد الصورة دي بعشر دقايق اتسرقت محفظتي وفيها بطاقتي المصري ورخصة عربيتي ورخصة القيادة وكارنيهاتي، ومش عاوزة احكي عن الوقت اللي أخدته عشان اطلعهم تاني ومعاناتي".

لحم الخنزير

وروى محمد جاد، تجربته مع عدم معرفته بأنواع الطعام بالخارج وتناوله لحم الخنزير: "وأنا في سنثيا، مكنتش بلاقي حاجة تتاكل غير مشتقات البيض، والفاكهة الآسيوية... مراتي بقى كانت عايشة على شرايح لحمة مقلية اسمها "pork" مكتوب عليها حلال، كانت بتطلبها في كل وجبة هناك، لغاية لما بظروفها اكتشفنا بعد أسبوع واحنا ف رحلة سفاري مع ناس عرب إنها لحم خنزير، لما سألنا الشيف أومال مكتوب عليه حلال إزاي؟ ومش مكتوب "pig"؛ قالنا أصله مدبوح مش مصعوق".

ونصح أحد مستخدمي فيس بوك، بعدم السفر وصعود جبال سانت كاترين، بعد معاناته في رحلته: "رحلة صعود جبل سانت كاترين اوعي تعملها زيي وتطلع يوم واحد صد رد من القاهرة عشان هتكره حياتك.. واوعى تعملها وانت في شرم أو دهب عشان هتكره حياتك برضه، هتفضل ماشي ماشي والدنيا ضلمة كحل ياجماعة فين الجبل يقولك لا إحنا عشان نوصله بنمشي 3 كيلو، وأول ما بتوصل الجبل قسما بالله بتبقي خلاص قربت تفرهد".

الرحلة انتهت على كرسي متحرك

بينما كانت هناك بعض النصائح المليئة بالآلام، فروت "حنان" تجربتها في السفر والتي أفقدتها قدرتها على المشي: "في كل سفر من سفرياتي كنت بحب أعمل قفزة في معالم الدولة، في جنوب أفريقيا كلفتني القفزة مواصلة الرحلة على كرسي، الحذر واجب وخاصة في السفر".

وجاءت بعض التجارب خفيفة الظل لم تخل من الفكاهة، فنشر إسلام عادل، صورة لابنه وهو يمسك بطة، معلقا: "متغلطش_غلطتي وتسافر بلدك وتسيب ابنك لوحده في عشه البط".

سوبيا في المطار

وكتبت مينو صالح: "وأنا بتفتش في المطار ظهر للأمن على الجهاز بودرة، قلتله بودرة إيه ياباشا أنا بشم السجاير أدوخ.. معلش هتتفتشي تفتيش خاص وافتحي الشنطة، فتحت الشنطة بيقولي إيه ده يا فندم؟ ويبصلي، وهو كيس فعلا أبيض شبه الدقيق.. قولتله والله ما أعرف أنا مجهزتش شنطتي.. قررت أكلم أختي في الوقت ده أقولها انتي حطيتي إيه في الشنطة لونه أبيض، وهنا اكتشفت إنها سوبيا.. عشان رمضان كان باقي عليه أسبوع.. وقفت وسط 5 ظباط ومحرجة جدا أقوله إيه بعد ما حسيت إن مجرم عتيد الإجرام.. وطيت صوتي وقلتله دي سوبيا يا فندم.. شاور للأمين وقاله خد يا ابني اعملنا كوبايتين ماهي ناقصة.. لا تكن مثل أختي وحضر شنطتك بإيدك".

رحلة الولاحاجة

فيما لم يترك إسلام أحمد، الهاشتاج دون أن يشارك فيه، فعلق: "مبكتبش البوست ده عشان أكسب.. أبسلوتلي لا.. أنا بكتب عشان أحذركم من رحلة الذهاب بلا عودة.. رحله اللاتراجع .. رحلة الولا حاجة .. رحله اللانهاية وما بعدها".