"إيثار" تنقذ الحيوانات المشردة بعلاج و"أكل مطاعم"

20 شاباً من الجنسين، ينطلقون فى مجموعات متفرقة فى شوارع محافظة بورسعيد، بحثاً عن الكلاب والقطط لتوفير الطعام لها وتوقيع الكشف الطبى عليها، وتقديم بعض الإسعافات الأولية فى حال إصابتها بأى مرض نتيجة بقائها فى البرد القارس.

تتعاون إيثار عبدالرحمن، مسئولة حملة الإطعام، مع بعض المصانع والمطاعم، لمدّهم ببعض المواد الغذائية التى يقدمونها إطعاماً للحيوانات المشردة التى تحيا فى ظروف جوية صعبة: «أصحاب المطاعم بيجهزوا لنا وجبات مختلفة خاصة بالقطط ووجبات تانية للكلاب، بتكون صحية جداً فيها بروتين وخضار»، يصطحب منظمو الحملة طبيباً بيطرياً فى جولاتهم الميدانية، لإجراء الكشف على الحيوانات: «لما بيقابلنا حيوان تعبان سواء من البرد أو مصاب بأى مرض تانى الدكتور اللى معانا بيعمل له الإسعافات اللازمة، ولو الحالة خطيرة ويحتاج مثلاً لعملية جراحية بننقله للعيادة أو بيروح شيلتر وبعد التعافى بنعرضه للتبنى».

تقوم «إيثار» بهذه الجولات يوم الجمعة من كل أسبوع، وأحياناً تخصص يوماً آخر فى منتصف الأسبوع: «الحملة فى الأول كانت قايمة على الجهود الذاتية، ونص الأكل والدواء اللى بيروح للحيوانات بيكون بتبرع شخصى مننا، لحد ما أصحاب المطاعم ساعدونا، وده خلانا نتوسع ونروح لأماكن أكتر».

تقضى أكثر من ساعتين وسط الحيوانات حتى تطمئن عليها، كما أنها تقوم ببناء بيوت من الخشب الخفيف للحيوانات لحمايتها من البرد: «بننزل بأكياس مشمع وخشب ونبنى عشش صغيرة للقطط خصوصاً الصغيرة عشان تتدفى ومش تموت، وأصحاب المحلات بيساعدونا كتير لما بيلاقونا بنساعد الحيوانات وبنبقى مطمنين عليها أن فى حد هياخد باله منها فى غيابنا».

• الكلاب
• توفير الطعام للحيونات
• الحيوانات المشردة
• الحيوانات
• الكلاب
• توفير الطعام للحيونات
• الحيوانات المشردة
• الحيوانات