محل يدعم حق الطفل في التعليم: الأرباح من حقهم

08:21 م | الاثنين 11 نوفمبر 2019

«عائد ملابسك هيروح لبناء مدارس فى المناطق الفقيرة»، شعار أطلقه صاحب أحد محال بيع الملابس فى منطقة الهرم، الذى خصص الأرباح التى يتحصل عليها نتيجة بيع قطع التصفيات من الملابس لصالح إحدى الجمعيات الخيرية التى تساعد فى بناء المدارس فى المناطق الفقيرة.

محمود سعيد، صاحب الفكرة، يروى أنه بدأ فى تنفيذها منذ عام تقريباً: «الفكرة بتخدم المجتمع من ناحيتين جانب إنى ببيع قطع ملابس بأسعار مخفضة والجانب التانى إننا بنخدم بيها المدارس ونخدم طالب إنه يتعلم». يروى «سعيد» أنه وجد إقبالاً كبيراً من جانب الزبائن منذ اللحظة الأولى من تنفيذه للفكرة: «الفكرة بتتنفذ على قطع التصفيات من الملابس سواء الشتوى أو الصيفى، إحنا راعينا إن التنفيذ يكون فى فرع منطقة الهرم، المنطقة يوجد فيها عدد من سكان الطبقة المتوسطة، وبتخدم أحياء كتير حواليها فى محافظة الجيزة، هما دول اللى بنستهدف بيهم منتجاتنا من قطع التصفيات، عندنا بنطلونات جينز وسويتشيرت وتيشيرتات مختلفة تناسب كل الأعمار سواء الأطفال والشباب من البنين والبنات».

وتتراوح أسعار القطع من الملابس بين 100 و150 جنيهاًً: «كل شهر بيكون فيه عائد بيروح لصالح الجمعية لخدمة الطلاب وبناء مدارس فى القرى الفقيرة زى اللى نفذتها الجمعية فى البحاروة فى العياط، هدفنا الاستمرارية وعمل الخير».

وحسب شيماء طنطاوى، المدير التنفيذى للجمعية، فإن الفكرة تحدث فى إطار الخدمة المجتمعية للطلاب وتنمية الأطفال بالتعليم: «إحنا نفسنا نسلط الضوء على الإيجابيات وناس كتير تعمل زيها، هى موجودة لكن مش منتشرة على أرض الواقع، أطفالنا محتاجين مننا كل فكرة خلاقة».