في اليوم العالمي لـ"النباتيين": خصومات وأكلات مبتكرة
في اليوم العالمي لـ"النباتيين": خصومات وأكلات مبتكرة
- اليوم العالمى للنباتيين
- النباتيين
- الوجبات النباتية
- التغذية النباتية
- اليوم العالمى للنباتيين
- النباتيين
- الوجبات النباتية
- التغذية النباتية
بالتزامن مع اليوم العالمى للنباتيين، قرر أصحاب عدد من المطاعم تقديم بعض العروض والوجبات المجانية للترفيه عن الزبائن، ومشاركتهم بعض الأجواء الاحتفالية بهذا اليوم.
«خصم بنسبة 25% على الوجبات المقدمة للزبائن»، هكذا احتفل أحمد الشلبى، صاحب مطعم لتقديم الوجبات النباتية، باليوم العالمى: «بحاول أشارك النباتيين على مستوى العالم فرحتهم، وأدعمهم فى الطريق اللى اختاروه لأنفسهم، نسبة النباتيين على مستوى العالم مش كبيرة، وبالتالى محتاجين ندعم بعض فى كل مناسبة، خاصة الناس اللى اتبعت النظام ده لأنه صحى».
اتجه «الشلبى» إلى العمل فى مجال التغذية النباتية حديثاً، تحديداً منذ عام: «الفكرة بدأت معايا لما كنت بقدم وجبات نباتية ساعة صيام إخوانا الأقباط، وحبيت أكمل فيها وأكون مختلف ومميز».
"الشلبى" يقدم "برجر وكفتة وتشيز كيك"
«تيك فيجين، بانيه، كوردن بلو، كبدة إسكندرانى، ستيك، برجر، كفتة»، وجبات يقدمها «الشلبى» فى مطعمه، تحمل أسماء أطباق شهية، تلقى قبول الزبائن: «دى كلها وجبات نباتية، بتتصنع من كتان وفول الصويا ولبن الصويا والجبن الموتزيريلا النباتى، بتدينا نفس قوام ولون اللحمة وبنحط ليها فليفرز».
كما يقدم «الشلبى» بعض أصناف الحلوى للنباتيين: «بنعمل تشيز كيك نباتى وآيس كريم سندوتش نباتى، ونسب الإقبال كويسة فى مصر، خاصة من جانب الناس اللى بتتبع نظام غذائى صحى، وبيمتنعوا عن الكوليسترول الموجود فى اللبن والبيض واللحمة».
خصم آخر، ولكن بنسبة أقل ١٥% يقدمه مطعم متخصص فى الوجبات النباتية بالقاهرة، وتروى سمر كمال، صاحبة الفكرة، أن المطعم يفتح أبوابه اليوم للاحتفال برفقة عشاق الوجبات النباتية: «إحنا على طول إجازة فى يوم الجمعة، لكن بمناسبة اليوم العالمى للنباتيين قررنا نفتح الجمعة ونستقبل الزبائن، كما قدمنا الدعوة لبعض المشاهير باتباع نظام التغذية النباتى».
"سمر" تفضل الأكل البيتى
وبالنسبة للأكلات التى تقدم بالمطعم، تقول «سمر»: «بنقدم أكل بيتى نباتى زى بطاطس بالمشروم، مكرونة بالصلصة وصوص الفلفل، مسقعة، مكرونة بالسبانخ، وبنحاول خلال هذا الأسبوع نقدم للزبائن وجبات هندية نباتية، كنوع من الاحتفال بالمناسبة، وفى نفس الوقت للتنويع فى الطعم المقدم».
