بريد الوطن| نطقت دموعى
بريد الوطن| نطقت دموعى
نطقت دموعى تعبر عن اللى حصلى
لما نورك يا ربى وصل لى
إيه غير الدموع يوصف فرحتى
وأنا بين إيديك بصلى
نورك ف سما قلبى برق
طفش طير القلق
حضن قلبى الأمان
اللى من زمان عنى افترق
خدتنى منك الدنيا وناسها
حجبتنى عنك نفسى ووسواسها
بضمة واحدة من حضنك
لقت روحى خلاصها
ناديت عليه كتير ياما
وبعتلى أكتر من علامة
لكن بتجاهل قابلت نداك
وسبت نفسى للدوامة
صورلى شيطانى طريقك أشواك
وإنى محال ألقى سعادتى معاك
اتسرسبلى من ضعفى
وزينلى طريق الهلاك
خوفنى من الندم والتوبة
فهمنى أن سكته عليا مكتوبة
وإنى مهما دعيتك تهدينى
هترجعلى دعوتى مغلوبة
لكن حال الدنيا اللى ما بيدوم
علقنى ف مشنقة الهموم
وناديتك لبيت ندايا
بنور قهر ف قلبى الغيوم
مصطفى سيد عبدالسلام
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
