بريد الوطن| حدث بالفعل: كفر الغاب صيف ١٩٧٩
بريد الوطن| حدث بالفعل: كفر الغاب صيف ١٩٧٩
كشف منزلى ببيت فى الطاحونة بكفر المرابعين، دخلت حجرة المريضة وكانت مزدحمة بالأقارب والجيران، وازدادت ازدحاماً بعد دخولى، وتعالت أصوات الترحيب بالدكتور الغالى ابن الغاليين، اتجهت مباشرة إلى المريضة التى نظرت لى نظرة شكر وعرفان وطمأنينة: «ازيك يا حاجة؟ خير إن شاء الله»، «ازيك يا دكتور؟
«إيه اللى تاعبك يا حاجة؟»، «رطوبة يا دكتور، فى جنبى»، «أنهو جنب يا حاجة؟»، «البحرى يا دكتور»، «من إمتى يا حاجة؟»، «من الموسم اللى فات، قبل جواز أمينة بنتى»، تبارت الجارات والأقارب فى إعطائى معلومات متضاربة، مما أصابنى بحيرة: «وجع جنبها جالها بعد نطحة جاموسة رمضان اللى فات»، «جالها بعد وجع راسها العيد الصغير»، «جالها بعد ورم رجليها قبل جواز أمينة»، يجب أن أحترم كل الآراء، فهم منى وأنا منهم، قررت بسرعة أن نشترك جميعاً فى كتابة الروشتة، وكانت الجارات بدأن بالفعل فى وضع خطة العلاج، أولاً أكلة كوارع يومياً صباحاً طرف الحاجة تاج البها، وكانت سيدة شهباء طويلة القامة، ثانياً حقنة تراى بى عضل «يوم بعد يوم»، مع لزقة ألمانى بزيت الخردل طرف الدكتور يوسف جابر، ثالثاً طاسة الجعزة عشان خضة نطحة الجاموسة طرف الحاجة فاطمة أم عمر، رابعاً فرخة شامورت بالتبادل مع طاجن بطاطس باللحمة طرف الحاجة ثريا، لم يكن فى البلد صيدليات، وإنما مخزن أدوية وحيد.
دكتور يوسف جابر - دفعة ٧٧ قصر العينى
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
