بريد الوطن| درجات علمية فى سوق الألقاب
بريد الوطن| درجات علمية فى سوق الألقاب
يا دكتور الحقنى، البلاعة اتسدت والميه غرقت الشقة، والحنفية بتنقط طول الليل والمحبس متربس ومش بيقفل، أرجوك الحقنى يا دكتور، تسلم إيديك يا باشمهندس، الله ينور عليك، النور رجع تانى، ونورت البيت وربنا ستر، ترن ترن ترن.. أيوه الحمد لله، أهلاً يا كابتن، كويس إنك ما اتأخرتش عليا أحسن هموت من الجوع.. تحت أمرك يا بيه أُمال أنا شغلتى إيه، ده أنا طيار، يا دكتورة لو سمحتى البنت حرارتها مرتفعة وطول الليل بتخرف يا ريت تيجى تقيسى لها الحرارة ولاّ تحطى لها لبوسة.. يا أستاذ يا أستاذ ممكن لو سمحت تقولى أروح للعنوان ده إزاى، أوم أوم بصى مش عارف أقراه بس هناك عند العمارة الكبيرة دى فيه واحد ضابط أمن ممكن تسأليه.. أربع خمس أو سبع سنين بعد ثالثة ثانوى طلعت روح طالب العلم فيهم علشان يحصل على درجة علمية ويبقى مهندس أو أستاذ أو طبيب، أو كابتن بحار أو طيار أو ضابط وبعده تطلع روحه وتقف أحلامه وتضيع سنينه وأيامه لحد لما ياخد درجة الماجستير وكمان أربع سنين أو أكتر يحضر فيهم الدكتوراه علشان يحصل على درجة الدكتوراه، مع احترامى لكل أصحاب المهن الشريفة ولكل طَموح بيقدر يجنى الأموال ويعمل ثروات بطرق نظيفة ومشروعة، انتم على عينا وراسنا من فوق بس بعيد عن الدرجات العلمية.
علا صلاح
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
