ملابس الإحرام ارتفعت 50% عن العام الماضى وبائعون: طقم اقتصادى للنساء بـ250 جنيهاً

10:39 م | الأحد 21 يوليو 2019

تفاوت الإقبال على شراء ملابس الإحرام هذا العام ما بين متوسط وضعيف، حيث طرحت محلات الملابس أطقماً متعددة الجودة والسعر، فهناك ملابس ارتفع سعرها عن العام الماضى بنسبة 50%، وأخرى اقتصادية بجودة متوسطة تناسب كافة الطبقات، وتتراوح أسعار الملابس النسائية بين 250 و500 جنيه، والرجال بين 550 و900 جنيه.

ولجأ المقبلون على أداء مناسك الحج هذا العام إلى شراء الملابس ذات الأسعار البسيطة، باعتبارها تؤدى الغرض لأيام معدودة: «إقبال الناس مش زى الأول وبالنسبة لنا فى المحل بنجيب خامة واحدة وتكون سعرها مش غالى عشان تتباع معانا وسوقها يمشى».. قالها وائل مصطفى، مسئول أحد محلات الملابس القطنية بمنطقة الدقى، والذى شهد محله إقبالاً متوسطاً، وجاءت غالبية المترددين عليه ليسألوا عن الأسعار أولاً: «كل اللى بينزل يشترى بيبص على السعر الأول، لأنه مش بيبقى ناقص تكاليف زيادة على مصاريف الحج نفسها».

وتتنوع قطع الملابس بالنسبة إلى السيدات: «جلباب وملابس داخلية وحجاب وبنطلون من قماش اللينو، وده خفيف جداً عشان الجو بيبقى حر وبيشرب العرق ومش بيسبب تسلخات»، ويرجح «وائل» ضعف الإقبال على شراء ملابس الإحرام بسبب قلة عدد الحجاج فى كل عام عما يسبقه: «فيه ناس بتكتفى بالعمرة أكتر من الحج برضه عشان أسعار العمرة أرخص».

وهناك مستلزمات أخرى يحتاجها الحاج بخلاف الملابس، كالشمسية وسعرها يصل إلى 60 جنيهاًً، والشبشب بـ50 جنيهاً والكوتشى يتراوح سعره بين 100 و200 جنيه: «أسعارنا بسيطة زيها زى اللى بتتباع فى العتبة أو الأزهر ومتعمدين نبيع بالأسعار دى عشان نسهل حركة البيع شوية».

وفى محل آخر بميدان الدقى، ساد هدوء تام بالركن الخاص بملابس الإحرام، بسبب ضعف الإقبال على الشراء، وأكد محسن عبدالفتاح، مسئول المحل، أن غالبية المعروض من مخزون العام الماضى، ويبيعه بسعره القديم بـ250 جنيهاً، ويعتبر طقماً اقتصادياً، أما معروض هذا العام فيقدمه بأسعار مرتفعة نسبياً تصل إلى 900 جنيه: «كل حاجة وليها زبونها ودى بتكون قطن 100%، وبتشرب العرق وخامتها نضيفة لا بتتقطع ولا بتتبهدل»، ويؤكد ارتفاع الأسعار للضعف وتوقع إقبالاً أكثر خلال الأيام المقبلة على شراء ملابس الإحرام، خاصة الطقم الاقتصادى.

"محسن": "الناس عايزة تشترى اللبس بأقل سعر عشان يعوّضوا مصاريف الحج.. وساعات بوزَّع الشبشب مجاناً"

ويشرح «محسن» أنواع القطع التى يتكون منها كل طقم: «الرجالى يضم قطعتين فقط علوية وسفلية وله سترة بـ36 جنيه، وفيه ناس بتفضل تلبس بنطلون سعره 175 جنيه، والشنطة والحزام أسعارهم بين 20 و40 جنيه، أما ملابس السيدات بتكون جلباب والكومبين ده زى قميص داخلى وبنطلون وطرحة وسعره 450 جنيه».

ورغم أنه يعرض الملابس بأسعار ثابتة، فإنه يواجه أزمة أخرى، فصال المترددين على المحل: «الناس عايزة تشترى اللبس بأقل الأسعار بيحاولوا يعوّضوا المصاريف التانية بتاعت الحج، وإحنا بنحاول ننزل الأسعار بس بنسبة بسيطة كمساعدة مننا أنهم يقدروا يكملوا الحج على خير»، وأحياناً يقدم «الشبشب» مجاناً على ملابس الإحرام الخاصة بالرجال: «بتبقى حاجة فوق البيعة عشان ملابسهم هما بتبقى أغلى من السيدات وده فى حال لو اللى بيشترى حب يفاصل مش بارضى أمشّيه مكسور الخاطر»، ويقول إنه اعتاد هذا الركود فى بداية موسم الحج، ثم تتزايد حركة البيع والشراء كلما اقترب موعد سفر الحجيج.