تقاليع مقهى: عصير فى لمبة.. ولوحة على وش القهوة

09:51 م | الجمعة 05 يوليو 2019

يعشق التميز والتمرد على المألوف، حتى إن وصل الأمر لتقديم الطلبات لزبائن المقهى فى أدوات كهربائية. أحمد الجمال، قضى ١٦ عاماً فى العمل بالمقاهى والمطاعم بمحافظة الإسكندرية، وحاول تطوير المقهى الخاص به، بتقديم العصائر للزبائن داخل لمبات كهربائية، لجذبهم وزيادة المبيعات.

«بدأت الفكرة من سنة، والزبائن أعجبوا بها والدنيا ماشية، ولاحظت إن الناس بترحب بالأفكار المطرقعة، اللى بره الصندوق»، يقولها «أحمد»، الذى اختار اللمبات الجاز لتنفيذ فكرته، بدلاً من استخدامها فى أعمال الديكور، حيث قام أولاً بتنظيفها وتفريغها، ثم تعبئة العصائر بها: «بتستخدم فى تزيين الكافيهات كديكور، لكن أنا غيرت فكرة الناس عنها، فى البداية لما كنت بقدم العصير فيها كان الزباين بيستغربوا، ويصوروها ويضحكوا، دلوقت اتعودوا وبييجوا عشانها».

تتراوح أسعار العصائر المقدمة داخل لمبات كهربائية بين ١٥ و٢٠ جنيهاًً: «حريص إنها تكون فى متناول الجميع من باب المنافسة وعشان أحافظ على زباينى، وبقدم عصاير فريش طبيعية، ونوع تانى لعشاق الشيكولاته والقهوة». لم تتوقف ابتكارات «أحمد» عند هذا الحد، حيث قام باحتراف الرسم على وجه مشروب القهوة، أو ما يعرف بـ«لاتيه آرت»، لجذب الزبائن: «مخدتش كورسات فى النوع ده من الفن، لكنه خلاصة خبرة السنين، برسم بالكراميل والشيكولاته والكريمة البيضا على وش فنجان القهوة لوحات فنية، بستمدها من المود الخاص بالزبون».