كأس أمم أفريقيا فى ورشة فوم بالمرج: البطولة لمصر

08:07 م | الأحد 23 يونيو 2019

داخل ورشة فوم فى منطقة المرج، لم تغب الاحتفالات ببدء بطولة الأمم الأفريقية، حيث قرر صاحبا الورشة أشرف فضل الله وجرجس مكرم، نحت أكبر نموذج لكأس الأمم الأفريقية على الفوم، لمشاركة المصريين فى احتفالاتهم بتنظيم البطولة.

كأس ارتفاعها متر و30 سنتيمتراً، صنعها «أشرف وجرجس»، للسير على خُطى «التريند»، ولفت أنظار المشجعين: «طالما فيه حدث مهم وسبب فى سعادة الناس، ليه مانستغلش الفرصة ونشاركهم الفرحة، وأكيد هيبقى عليه الطلب، لأن كل المصريين دلوقتى مركزين فى أفريقيا»، حسب «أشرف» الذى أكد أنهما استغرقا أسبوعاً فى صناعة الكأس.

أكبر نموذج صنعه "أشرف" وصديقه بارتفاع متر و30 سنتيمتراً

ردود فعل إيجابية تلقاها «أشرف وجرجس» على الكأس، أسعدتهما وجعلتهما يعيشان حالة من البهجة: «واحد قال لى ده أحسن نموذج للكأس اتعمل، وواحد تانى قال لى إنه مميز جداً وخطوطه منحوتة بدقة، وغيرهم كتير، وأنا باشكر ربنا إنه عجب الناس». رفع «أشرف» الكأس المصنوعة عالياً، وعيونه كلها فرحة وسعادة، متمنياً أن يكون النموذج فأل حسن على المنتخب المصرى ويحقق فوزاً كبيراً فى البطولة: «دلوقتى إحنا عايشين أحلى جو فى البلد، الناس كلها فرحانة وحابة تشوف مصر منورة بالكاس، نفسى المنتخب ياخد الكاس وتكمل فرحة الناس».

حرص الصديقان على الاهتمام بكل تفصيلة أثناء نحت الكأس، حتى يخرج بشكل جيد: «شُفنا نماذج كتير علشان نعمل زيها، مانسيتش أى تفصيلة، بنحب دايماً أنا وجرجس مانسيبش غلطة، علشان تطلع الحاجة حلوة ومنورة».