بريد الوطن| أمّنا الغولة
بريد الوطن| أمّنا الغولة
بتنطى لسه من السما السابعة
وبترسمى وشك بالنور على السحابات
وبتلعبى السيجة يا عيّلة لوحدك
وبتحجلى بروحك فوق السبع سماوات
ميِسك رخام مقطوع من قلبك المشروخ
بتحدّفى دمعك.. كل النجوم بتدوخ
يا بت حُسن القمر.. جنبك يبان ممسوخ
وانتى اللى حُسنك آية وعلامة م العلامات
يا بت بزيادة كفياكى حجل ونط
عدى أربعين عمرك وانتى ف أول خط
يا بت معقولة.. لساكى ف الأولى؟!
لساكى هربانة للآخرة م الأولى
يلا انزلى لأمك بتنادى ع السلم
خبى قطوع كُمك عصايتها بتعلم
وانتى اللى غلطانة دايماً ومسئولة
نجلاء نعيم
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
