"من جمع القمامة لجني الثمار".. عامل نظافة يشارك بالاستفتاء "عشان بكرة"

12:36 م | السبت 20 أبريل 2019

مرتديًا زيه الأزرق الذي يميزه عن سائر المواطنين، ممسكًا بطرف عربة جمع القمامة، وقف الحاج سالم عبدالرحمن يوسف، عامل شركة النظافة بالقاهرة يجمع القمامة من أمام لجنة الجامعة العمالية في مدينة نصر، بعدما غمس يده في الحبر الفسفوري لتأدية واجبه الوطني في الإدلاء بصوته في استفتاء التعديلات الدستورية.

بسلام وهدوء رغم حرقة الشمس التي أكسبت بشرته سمرة شبه دائمة، وقف الحاج سالم فخورًا بمشاركته: "من حق كل واحد يشارك، الطابور واقف فيه البيه والباشا والراجل الغلبان اللي زي حالاتي، هي دي مصر اللي بحبها وبنضف أرضها ورصيفها كل يوم عشان تبقى أحسن".

ويستكمل الحاج سالم، حديثه مع "الوطن": ":أنا أدليت بصوتي عشان أضمن زيادة الإصلاح في كل الأماكن بمصر وعشان عيالي يلاقوا شغل والمرتبات تزيد ونبقى أحسن"، هكذا توقع عامل أن تنعم مصر بعد إقرار التعديلات الدستورية.

وأضاف: "اللي عمله الريس محصلش قبل كدا وبيفكر في المواطن الغلبان اللي زيي ودايما يقول كدا في خطبه، ومستنيين أكتر كمان، عايزين الريس يعدلنا المعاشات، أنا مرتبي 2150 وخلاص هطلع معاش السنة الجاية والمرتب هيتجز النص غصب عني وعندي 6 عيال أكبرهم 25 سنة وقاعد في البيت بيشتغل يوم وعشرة لا، وعليا قرض أخدته عشان استر بيه البنتين".

واسترسل: "مش عارف هسد ديوني إزاي بعد المعاش، فبطالب الريس يكمل في مشواره الله يعينه ويبص كمان للغلابة اللي زيينا أكتر، ده إحنا جالنا المرض من لم الزبالة بس مكملين عشان مصر تبقى أحسن ونضحي بروحنا كمان متغلاش على البلد".