بريد الوطن| من ابن لأمه: انت الحضن الدافى
بريد الوطن| من ابن لأمه: انت الحضن الدافى
الحضن الدافى، حبيبتى يا أمى، يا حضن دافى، يا نبع صافى، عن جمايلك وفضايلك، لو عشت عمر على عمرى، مقدرش أوفى، مقدرش أنسى يوم ما شيلتى حملى فى بطنك، واستعديتى يوم ولادتى، وكانت الأوجاع ماتتوصفش، وبرضه لسه مكملة فى ربايتى ورعايتى، أصلك أمى وحضن دافى، سهرت ليالى كتيرة طوال، تعب وإرهاق ليل ونهار، من أجلى أنا، من أجل أكون قيمة بوقار، وعن بحر حبك ما وقفتيش، وعن حنانك مبخلتيش، فى صغرى كنت عكازى، ووقت طفولتى عينك ترعانى، ولما كبرت وصرت طالب نصايحك أبداً ما مفرقانى، أصلك أمى، والأم جنة ربانى، ووقت عزى ووقت ألمى، كنت بتتألمى لمرضى، يا ريتنى مكانك يا ولدى، وتعدى بينا الأيام والليالى، وانت كل همك مستقبلى وحالى، وإزاى تشوفينى زهرة مضيئة، مهما أحكى وأوصفك حبك يا حنونة، عن تعبك وسهرك وربايتك ليا، مش هيكفى ١٠٠ مليون مقولة، أصلك انت حضن دافى، عمرى كله ليس كافى، أشكرك وأبوس إيدك، انت جنة وانت فرحة وانت أحلى حضن ليا، وقت الحياة ما تكونى جارحة، أمى يا أغلى من الدهب والماس، أمى وحضنى الدافى، كلامى عنك مش هيخلص، لو خلصت ألف كراس، أصلك أمى ونبعى ونبضى، ماهو بينى وبينك مش بس حبل سرى، لا ده كمان حب يكفى بلاد، يا أغلى هدية من ربنا ليا، يا أجمل وأرق عطية، يا رب يديك يا أمى ١٠٠ سنة كمان جاية، وأرد لك جزء من جمايلك.
عماد ملاك فهمى - أسيوط
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
