«دائري المريوطية»: مخالف بأمر الأهالى
«دائري المريوطية»: مخالف بأمر الأهالى
عشوائية مفرطة تخطف الأنظار، نداءات وصراخ متداخل، شلل فى حركة سير السيارات، توك توك يقتحم المشهد متحركاً بسرعة كبيرة جداً، تنطلق منه أصوات أغانى المهرجانات، ليسجل حضوراً لافتاً فى مشهد يثير السخرية.
"كريم": عاملين حِسّ بدل ما الناس تتثبّت
بعد المنزل المؤدى إلى منطقة فيصل، طابور من سيارات الأجرة توازى سور الدائرى الحديدى، يستند عليه كريم شعبان، شاب مهندم الهيئة ينادى برقة «أكتوبر أكتوبر»، وينتظر طويلاً لحين اكتمال عدد ركاب سيارته، يبرر وقوفه المخالف للقانون، بذوق لافت: «ما بنضايقش حد، إحنا هنا لخدمة الناس والتسهيل عليهم، والسعى ورا رزقنا بالحلال، فين العيب فى كدا؟، أنا متعلم على فكرة».. يقول «كريم» إنه يدرس فى المعهد العالى للحاسبات والمعلومات بـ6 أكتوبر، «فى سنة تالتة»، ويحرص على النجاح بتقدير، حتى لا تضيع النفقات التى يدفعها مقابل دراسته فى المعهد هباء، ويعمل يومياً بعد الساعة 2 ظهراً حتى الساعة 12 ليلاً: «إحنا بنعمل حس على فكرة للناس اللى بتعدى من هنا، بدل ما يتثبتوا أو حد يضايقهم».
فى الجهة المقابلة للنزلة، تقع عمارة من ثمانية طوابق، يسكن فى أحدها «أبوعمر»، الذى يعبر عن استيائه البالغ من نصب موقف السيارات العشوائى على الدائرى فى مواجهة شقته: «ما بنعرفش نرتاح فى بيتنا، ببقى راجع من الشغل مهدود حيلى ومحتاج أنام، وألاقى التباعين بينادوا على عربياتهم وصوتهم جوه راسى»، يصمت لوهلة ثم يكمل: «مراتى طفشانة على طول عند أهلها، وبتقولى هات لى شقة فى حتة هدوء، هو حد معاه تمن خرم إبرة دلوقتى؟».
يستيقظ «أبوعمر» فى السابعة والنصف يومياً، ويعمل بشركة خاصة ترسل أوتوبيسات لنقل موظفيها: «سواق أوتوبيس الشغل ما بيعرفش يقف لى قدام البيت دقيقة من الزحمة، والسواقين مسيطرين على المكان وعلى الطلعة والنزلة المخصصين للناس».
يختلف معه فى الرأى صاحب المحل التجارى فى الدور الأرضى من العمارة ذاتها، حيث يعبر عن ترحيبه بوجود الموقف، لما يترتب عليه من تكثيف عدد الزبائن المحتملين: «الناس بتيجى تركب لأشغالها من هنا، وتنزل آخر اليوم هنا برضه، فلو حد عايز يشترى حاجة بيلاقينا فى وشه»، ويعبر عن امتنانه لوجود الموقف بالقرب منه قائلاً: «بصراحة عاملين حس، محدش هيقدر يقرب من البضاعة ولا المحل أو يرازى فينا طول ما فيه حس فى الشارع»، مؤكداً خطورة الظلام الذى يسيطر على المنطقة بعد مغيب الشمس.
