بالفيديو| نص كلمة السيسي ينسف شائعات «الإخوان» عن أموال تطوير السكة الحديد

02:51 م | الأربعاء 27 فبراير 2019

«شائعات الإخوان» مسلسل وعرض مستمر تسعى من خلاله الجماعة «الإرهابية» إلى إثارة الفتن وترويج الأكاذيب، في محاولة منهم للنيل من اصطفاف الشعب خلف القيادة السياسية، وتشتيت الرأي العام وإثارة البلبلة.

لم يترك الإخوان حدثا إلا وتداولوا ادعاءات وشائعات حوله، فبعد حادث حريق محطة مصر نشر عدد من مستخدمي موقع التواصل الاجتماعي «فيس بوك» مقطع فيديو مقتطعا من سياقه للرئيس عبدالفتاح السيسي، يتحدث فيه عن تطوير محطات القطار، وأسعار التذاكر تحت عنوان «أنا كمان غلبان»، خلال افتتاح عدد من المشروعات التنموية في الصعيد، وهو يرد على كلمة هشام عرفات وزير النقل، حينما كان يستعرض تكلفة مشروعات السكك الحديدية، الجاري تنفيذها في الصعيد؛ التي وصلت لما يزيد على 10 مليارات دولار.

وطالب الرئيس السيسي وزير النقل بإعلان دخل مرفق السكة الحديد، «من فضلك تاني، إحنا بنقول الكلام ده لحضراتكم ليه جميعًا؟ إذا كنا إحنا بنتكلم على كهربة إشارات فقط، ورفع كفاءة خطوط، غير إن إحنا نشتري جرارات وعربيات للخط، هو دخل السكة الحديد كام في السنة؟»، ليؤكد عرفات أن دخل الهيئة: «التشغيل نحو 4 مليارات أو 5 مليارات، والإيرادات لا تتجاوز ملياري جنيه».

وقال السيسي: «أنا بقول الكلام ده لينا ليه؟ كلامي أنا هتلاقوه دايمًا مش مريح، بس دي الحقيقة ودي اللي خلتنا دايمًا مستوانا كده، إن الحقايق مابنواجهاش كما ينبغي.. والله العظيم أنا صادق معاكم في كل كلمة بقولها، ودماغي مع زمايلي في كل حاجة من اللي بتتعمل دي، ده مش جديد عليا، إنما الجديد اللي أنا بقوله لزمايلي من فضلكم قولوا للناس، اشرحوا للناس».

وأضاف الرئيس: «تقولي أنا هصرف 10 مليار علشان أكهرب، وأعمل ميكنة، الـ10 مليار دول لو أنا حطتهم في البنك لو خدت عليهم فايدة 10% يعني مليار جنيه، ولو بالوضع الجديد اللي موجود دلوقتي بسعر الفايدة يبقى 2 مليار جنيه، لما مرفق عايزين له أكتر من 100 مليار جنيه، لرفع كفاءته والشبكات، ده هو بيتكلم على الصعيد فقط، طب الكلام ده إحنا هنسده منين؟ هندفع اللي هو إحنا جايبينه قرض من كوريا وقرض من فرنسا، وقرض من هنا ومن هنا.. هاندفعهم منين؟ الدولة ما تقدرش تدفعهم».

وأوضح: «لما نيجي نقول المواطن أنا هزود عليك التذكرة جنيه، يقولك أنا غلبان مش قادر، طب ما أنا كمان غلبان مش قادر، أعملك سكة حديد آمنة ونبني بلدنا ونطلع قدام، ولا هنفضل في مكانا كده خايفين من بعض؟ عايزين البلد تتصلح وتطلع تبقى دولة ومواطنوها يحسوا بإن إحنا بنعمل تنمية حقيقية وبنهتم بيه بجد ولا هنفضل زي ما إحنا كل شوية يبقى في حادثة والناس تموت، وخدمة تبقى مش مظبوطة، أنتم عايزين أنهي واحدة فيهم؟».

وتابع حديثه قائلًا: «بناء الأمم وبناء الدول اللي تاخد مكانها على الأرض ليس بالأمر اليسير، فيه جهد وفيه معاناة وفيه حرمان علشان يتعمل، غير كده يبقى أنا هضحك عليكم.. أنا بجري على ده، وأقول وأشرح علشان نبقى كلنا عارفين الحكاية إيه.. الميكنة والكهربا اللي بتتعمل في الخطوط ورفع كفاءة الشبكة الهدف منها أمان وتنمية، وعلشان أقدر النهارده اتحرك مظبوط على الشبكة دت لازم أعمل الشغل ده».

وأكد الرئيس: «عايزين نبني بلدنا وتبقى بلد حقيقية، ولازم هنتحمل لأن إحنا لن نقبل إن إحنا يبقى مستوانا كده.. لازم ننهض ببلدنا، ونقوم بيها، وبفضل الله سبحانه وتعالى هنقوم بيها».