رسالة من زوجة أمير طعيمة لـ«الأهلاوية»: «مفيش تربية ولا أخلاق»

08:48 م | السبت 23 فبراير 2019

وجهت الفنانة المعتزلة جيني طعيمة زوجة الشاعر الغنائي أمير طعيمة، رسالة إلى جمهور الأهلي بعد شنهم هجوم على زوجها، الذي أعلن كرهه للنادي الأهلي، وندمه على أحد أغانيه التي كتبها له بسبب الشتائم التي وجهونها له.

كتبت "جيني" عبر صفحتها بموقع "فيسبوك": "لما توصلوا راجل طول عمره سيرته عطرة وبيحترم الصغير قبل الكبير والفقير قبل الغني، والضعيف قبل القوي".

وأضافت: "وأنا شخصيا عشت معه تحت سقف واحد وأتعلمت منه كتير عن احترام الغير احترام النفس ياما اختلفت منه ولسه هنختلف لكن لا عمري سمعته، بيسب ولا بيشتم ولا متلون ووطني حتي النخاع لدرجة إني ياما عملت مشاكل بسبب مواقفه مع ناس من وجهة نظري حقيرة والزمن أثبت ده".

وتابعت: "لما توصلوا راجل ما بيبخلش على حد بوقت ولا مجهود عشان يمتعكوا علي حساب بيته وولاده، ويتشتم وهو مش طرف في منازعات ولا بيشجع لا أهلي ولا زمالك ولا فريق غير المنتخب الوطني ده اسمه إيه".

واختتمت كلامها قائلة: "اسمه إن مفيش تربية ومفيش أخلاق، بالمناسبة أنا زمالكاوية ولا فارق معايا لا أهلي ولا زمالك، دي حاجة اسمها رياضة، والكرة لعبة زي أي رياضة، بس واضح إنكوا عاوزين تكرهونا في أي حاجة ولو بسيطة بتسعد الناس، علي الماشي كده، الأخوة اللي بيقولوا علينا بوابين، وماله دي مهنة شريفة ومش عيب".