بريد الوطن| كل سنة وأنت طيب يا مصرى
بريد الوطن| كل سنة وأنت طيب يا مصرى
يا أخى هى مصر كده، ربنا خلقها كده، أوجدها كده، أنشأها كده، وحفظها كده، تسمع أذاناً على مئذنة، وبعدها تسمع جرس كنيسة، تدفن شهيداً، وبعدها تسمع أغنية العيد.. هى مصر كده.. رئيسها ولا يهمه، يهتف فى قلب الأمم المتحدة تحيا مصر.. تلاقى كل الحاضرين وقفوا احتراماً لاسم مصر.. هى مصر كده.. أم صابر صاحبة مشنة الفجل تعمل جمعية علشان تدفع مصاريف بنتها فى الكلية وتلاقى ابنها الكبير يبوس إيدها وعلى كتفه دبورة الحربية، هى مصر كده، تفطر رمضان على طبق ملوخية من إيد أم جرجس والطبق يرجع تانى مليان كنافة بالشعرية، هى مصر كده.. وربك حافظها كده. إحنا كده المصريين، مسلمين مسيحيين صابرين صامدين مصليين حامدين شاكرين راكعين ساجدين راضيين قانعين سعداء مبسوطين، تعدى علينا المحن وإحنا دايماً واقفين، ما انتنى لينا ضهر ولا انكسر لنا عود، علشان كده دائماً بأمر الله منصورين. كل سنة وأنت طيب يا «مصرى»، لا فيه مسلم ولا مسيحى، كل سنة وأنت طيب معايا، كل سنة وأنا طيب بيك.. تحيا مصر.
شادى العجمى
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
