معرض الدقى للكتاب: الدخول مجاناً.. وخصومات من 30 إلى 90%

07:33 م | السبت 12 يناير 2019

معرض كتاب موازٍ للمعرض الرسمى يرفع شعار «بأقل مجهود وأقل تكلفة»، ينطلق تحت عنوان «معرض الدقى للكتاب»، يوم 26 يناير الحالى ويستمر حتى 2 فبراير المقبل، يحتوى المعرض على 50 ألف كتاب، ويفتح أبوابه للجمهور مجاناً، ويشارك فيه دور النشر المصرية والدولية كـ«عصير الكتب، الرسم بالكلمات، بالعقل نبدأ، مكتبة مصر، المحروسة».

داخل فيلا إبداع فى الدقى، يتم حالياً التجهيز للمعرض لاستقبال الجمهور من الـ9 صباحاً وحتى 11 مساء، حسب عمر على، صاحب فكرة المعرض، الذى يحرص على تنظيم وتنسيق المعرض بنفسه، من أجل جذب الجمهور المتضرّر من نقل معرض القاهرة الدولى للكتاب إلى التجمع الخامس: «السنة دى لمست من ناس كتير أنها متضررة جداً من نقل المعرض ورمت من دماغها فكرة أنها تروح المشوار ده كله علشان تشترى كتب، ففكرت إنى أفتح فيلتى معرض كتب خلال الفترة دى».

يضم المعرض تشكيلة مختلفة من الكتب فى جميع المجالات، بالإصدار الحديث والقديم، وكذلك يوفر ركناً خاصاً للكتب المستعملة والتراثية، بأسعار مخفّضة تبدأ من جنيه واحد فقط: «كل دار هيكون ليها جناح خاص بها زى معرض الكتاب بالظبط، وهيبقى فيه خصومات كتير توصل لـ90% بالنسبة للكتب القديمة، والجديدة عليها خصومات 30%».

حينما اقترح «عمر» فكرة المعرض كبديل موازٍ لمعرض الكتاب الرسمى، وجد تعاوناً كبيراً من معظم دور النشر: «كده الناس اللى مكسّلة تروح المعرض مش هيبقى ليها حجة، إحنا عملنا معرض قريب وكمان بأسعار رخيصة»، وتوجد مشاركة متميزة من دار الرسم بالكلمات للنشر والتوزيع، التى تقدم خصومات وجوائز للقراء المتفاعلين: «هنكون مشغلين أيام المعرض الأساسى، لكن اتفقنا مع معرض الدقى إنه يعمل خصومات للقراء، علشان اللى مش هيقدر ييجى للتجمع».. حسب محمد المصرى، مسئول دار «الرسم بالكلمات».