بريد الوطن| فى نُص الليل
بريد الوطن| فى نُص الليل
بتسمع صوت موسيقى حزين
وهمس غريب ف نص الليل
بتخرج بره وحدتها
وتفتح بابها للتفاصيل
تقرب جنب شباكها وتلمح نور ف بلكونة
تشوف خيالات بتتحرك بحركة سريعة مجنونة
وإيد ع البعد بتشاور.. هتيجى معانا والا بلاش؟!
وتتلفت وتتبسم.. تشوفه قصادها متجسم
فتشهق شهقة مكتومة
يضمها ليه فتتقسم
لمليون قصة محرومة
من النهايات..
تقوم م النوم.. تفتّح عين على سريرها
تمد إيديها ف اطمئنان
بإن الحلم عدى وكان
فتتنهد وتتنفس
وتسمع صوت كده بيهمس
تروح تفتح بسرعة الباب
تلاقى الريح بترمى كتاب
قصاد البيت
ومكتوب فيه صباح الخير
ده إهداء ليكى من العفريت
نجلاء نعيم
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
