بريد الوطن| نصيحة «مبطلاتى حشيش»
بريد الوطن| نصيحة «مبطلاتى حشيش»
أكبر ضرر ممكن تعيشه فى حياتك لما تبقى فرحتك وحزنك وهمك واقفة على حاجة هى لا بتنفعك ولا بتخليك تعيش صح، لما تبقى حياتك ما بتتقدمش وتستسلم لحاجة تخليها ترجعك لورا أكتر، يبقى انت ماشى غلط، لما تقنع نفسك إنك بتشرب حشيش بمزاجك وممكن تبطل فى أى وقت، وتصدق الكدبة دى، يبقى انت ماشى غلط، لما تبقى حالتك المادية وحشة، وبتشترى حاجة بتخليها أوحش عشان تنسى إن حالتك المادية وحشة يبقى انت ماشى غلط، لما ييجى عليك وقت وتلقى إنك ممكن ما تاكلش ولا تشرب كويس عشان تقدر توفر تمن الحشيش يبقى أنت ماشى غلط، لما تلقى اللى حواليك كلهم ناس ملهاش طموح وعايشة عشان السيجارتين وتبقى زيهم غصب عنك عشان مش قادر تبطل يبقى انت ماشى غلط، لما صحتك تنزل وانت مش حاسس إنها بتنزل عشان الحشيش بقى المسكن بتاعك يبقى انت ماشى غلط، لما تلقى نفسك تايه ومش عارف تفكر ولا تخطط لأى حاجة غير لما تشرب الحشيش يبقى أنت وصلت لآخر مراحل الغلط، لما تلقى ربنا بيبعت لك حد بينصحك كل فترة إنك تبطل وتتريق على كلامه وماتفكرش للحظة إن ربنا بيديك فرصة تبقى إنسان محترم، وحياتك تبقى أحسن يبقى أنت بقيت الغلط نفسه، لما تخسر الناس اللى بتحبها وييجى عليك وقت تبكى إنك ضيعتهم من إيدك فى وقت كانوا محتاجينك يبقى لازم تصلح الغلط وتفوق، يا شباب ويا بنات ويا أى حد استسلم للإحباط.. الحشيش أوله ضحك وآخره ندم كبير.
أحمد سلاش
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
