"حدد عقاب وبديل".. كيفية التخلص من عاداتك السيئة في 7 خطوات
"حدد عقاب وبديل".. كيفية التخلص من عاداتك السيئة في 7 خطوات
يحاول الكثيرون التخلص من العادات السيئة الموجودة بهم سواء في حياتهم الخاصة أو في عملهم، كونها تضعهم في مشكلات كثيرة.
ويقدم مصطفى خليفة استشاري تطوير الأعمال 7 خطوات للتخلص من عاداتك السيئة وتحويلها إلى عادات إيجابية جيدة تساعدك على النجاح في حياتك.
1. حدد العادات السيئة
"أول خطوه لازم نعرف عاداتنا السيئة وده من خلال معرفة رأي الناس فينا أو تقيمنا لنفسنا بعد مشكله معينة، أهم من الحل أنك تدرك أن عندك مشكلة وتعترف بيها".
2. ضع هدف
"حط هدف لنفسك أنك تشتغل على العادات دي في وقت معين، ومن خلال خطة حدد أولوياتك واتفق مع نفسك على الحاجات اللي هتعملها".
3. خلق رقيب داخلي
"تابع تصرفاتك وحط نفسك تحت كاميرا، تخيل من وقت للتاني أنك شايف نفسك من بره وشوف التصرف ده صح ولا غلط وهل ده متوافق مع اتفاقك مع نفسك ولا لأ".
4. خلق رقيب خارجي
"اتفق مع حد من صحابك أو المقربين ليك أنه يديلك الملاحظات أول بأول ويقولك لما تعمل حاجه مش صحيحة، مهم تختار حد يهمه فعلا مصلحتك ويكون امين في رأيه".
5. حدد بديل
"في صفات كتير مش بسهولة توقفها، زي مثلا النرفزة أو الرد بدون تفكير وغيرها، وهنا مهم تختار عادة بديلة تغير بيها العادة السيئة".
6. حدد عقاب ومكافأة
"حدد عقاب لنفسك لو رجعت لعادة من عاداتك السيئة، وكافئ نفسك لما تقعد فترة من غير ما تغلط، حاول يكون العقاب فعلا في حاجه تفكرك، والمكافأة تكون حاجة بتحبها فعلا وتستناها".
7. التغيير بيحصل في وقت
"لازم تكون صبور وتشتغل على نفسك، التغيير مبيحصلش في يوم وليلة، فيه جملة مشهورة بتقول عشان تكتسب عادة لازم تعملها لمدة شهر وعشان تبقى بتعملها من غير تكلف وتبقى في طبيعتك محتاج 3 شهور".
