بريد الوطن| لسه فيه عشرة
بريد الوطن| لسه فيه عشرة
عنتر يشوف الويل
ساب اللجام بدرى
وخيوله نازلة الميدان
وعلى الله راح تجرى
يا صبر طال الليل
عجِّزتْ يا صبرى
فين الشوال أدِّيك
م القمح كام كيلة
بقرك يا مصر عجاف
مش قادرة ع الشيلة
يا أرض ناشفة الطوب
مستنظرة المطرة
يوسف أبوك يعقوب
عايزة العيون قطرة
دابت حبال الشوف
جفت منابع نيل
وبتنشف الخضرة
قلب السحاب والجوف
مفيهوش ولا قطرة
يوسف قميصك فين
للقلب هينور
والنور يعود للعين
يمسح جبال حسرة
امتى يا رب وفين؟
هنعد للميه؟
دنا لسه فى عشرة
سامح لطف الله
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
