السيسي لـ"عبدالغفار": إرساء نظام تقييم الطلاب لن يستغرق 7 سنوات

03:17 م | الاثنين 05 نوفمبر 2018

وجه الرئيس عبدالفتاح السيسي، الشكر للحاضرين في جلسة "كيف نبني قادة المستقبل" ضمن فعاليات اليوم الثالث لمنتدى شباب العالم، وعلى حديثهم ومداخلاتهم التي وصفها بأنها "أكثر من رائعة وثمينة جدًا".

وأضاف السيسي، "كنا محتاجين نقدم للناس تطوير التعليم ونبذل جهد لإقناع الناس بالمسار اللي إحنا ماشيين فيه، وإحنا بنتلكم مع دكتور خالد عبدالغفار وزير التعليم العالي من 20 يوم أو شهر، وبقوله هتعملوا إيه في التشريعات المطلوبة علشان يبقى فيه نظام التقييم المعمول بيه، ويحقق الهدف المطلوب منه".

وتابع السيسي: "مهم أوي اللي بيتابعونا يعرفوا إنه المسار بياخد وقت، والحكومة مش متأخرة، هناك قوانين بتحكم الدولة، وكنا بنتكلم على إننا عاوزين نعمل المسطرة في كل التعليم بتاعنا في قياس وتقييم مواطنينا، بعيدا عن تدخل العامل البشري، قالي هنقدر نعمل ده كمان 7 سنين قولتله يعني أنت عاوز تأخرني 7 سنين.. ليه يادكتور؟".

وأكمل السيسي: "مش هقول تفاصيل أكتر من كدا.. بس هو قالي الطلاب اللي دخلوا دلوقتي الكليات دخلوا على معاير تقيمية معينة ولو غيرنا هنظلمهم.. قولتله لأ مش هستحمل كدا.. اديني الدفعات الموجودة دلوقت بالشكل المستهدف اللي إحنا عاوزينه وقولتله نراجع نفسنا والآخرين ونطلع بالإجراء السنة دي علشان نبتدي فيه".

وانطلقت فعاليات منتدى شباب العالم في نسخته الثانية بمدينة شرم الشيخ، أول أمس، بجلسة افتتاحية بمشاركة ما يزيد على 5 آلاف شاب وفتاة من مختلف دول العالم ممثلين لـ160 دولة حول العالم، وذلك برعاية وحضور الرئيس عبدالفتاح السيسي، على أن يُستكمل باقي الجلسات حتى الثلاثاء 6 نوفمبر 2018.

وتتضمن فعاليات المنتدى، لأول مرة، تجربة فريدة من نوعها بافتتاح مسرح شباب العالم ليكون ملتقى شبابيًا للفنون من مختلف دول العالم، وتستمر عروضه على مدار 3 أيام، إضافة إلى انطلاق راديو شباب العالم، تحت شعار "لنكسر حاجز الصمت"؛ بهدف إلى الاستفادة من التنوع الفريد والثقافات المختلفة عبر تقديم عدة برامج شبابية.

ويضمّ جدول الجلسات -وفق ما أعلن عنه الموقع الرسمي للمنتدى- نحو 30 جلسة تتمثل في 18 محورًا، إلى جانب محاكاة القمة العربية الأفريقية، إضافة إلى حفلتي الافتتاح والختام، وورش العمل التي تسبق عقد المنتدى.