بريد الوطن| عن الفرحة وإسعاد الآخرين.. حاجات بسيطة
بريد الوطن| عن الفرحة وإسعاد الآخرين.. حاجات بسيطة
من أجمل الحاجات إنك تقوم من نومك مبسوط، مش عارف إيه السبب الحقيقى النهارده من الأيام دى، فضل من ربنا إنك قايم فرحان، بعد ما أخدت الدش بصيت فى المراية وعرفت قد إيه نعم ربنا علىّ كتيرة، إحساس حلو إنك تكون فرحان لمجرد الفرحة، مفيش حاجة حصلت عشان تحس الشعور ده، ممكن يكون خير جاى لك فى الطريق، غالباً الواحد منا بيحس مقدماً باللى هيحصل له، يعنى تقوم فرحان ومبسوط تلاقى كل يومك أخبار مفرحة وسعيدة، بتخلينى أمسك فيه وأتبت، من الحاجات الجميلة برضه إنك تنشر الفرحة على كل اللى حواليك، جرب تكون مصدر سعادة للمحيطين بك وانت خارج من بيتك الصبح بتصبح على جيرانك، حاجات بسيطة ممكن تصنع فرحة للى حواليك، خد علبة شيكولاته وانت داخل شغلك وفرق منها على كل اللى يقابلك، اللى تعرفه واللى ما تعرفوش، صدقنى هتقابل واحد قد إيه كان محتاج حد يحس بيه ويقول له إحنا معاك وجنبك ودى ثوابها عظيم، وهتقابل واحد تانى أما تشوف ضحكته وسعادته بالموقف ده هتفضل طول اليوم مبسوط، ست كبيرة تدعى لك وتقول لك ربنا يسعدك يا ابنى.
محمد فهمى سويلم
محام - المنوفية
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
