10 علامات تدل على إصابتك بالاكتئاب
10 علامات تدل على إصابتك بالاكتئاب
هناك بعض العلامات التي تدل على أن الشخص يمر بحالة اكتئاب غير مرضية أو تحتاج لعلاج طبي، ولكن يحتاج الشخص أن يعرفها مبكرا حتى يحاول تغير الأجواء المحيطة به ولا يستمر في هذا المزاج السيء لفترة طويلة والتي تؤثر على الحياة بشكل سلبي.
ويقدم مصطفى خليفة استشاري تطوير الأعمال 10 علامات تدل على أن لديك اكتئاب كما يلي:
1. الشعور بكسل وتعب مستمر
لما تلاقي نفسك كسلان عن عمل أي شيء وخصوصا الحاجات اللي بتحب تعملها ده مؤشر سيء، وكمان احساسك بالتعب المستمر حتى ولو مفيش مجهود، ولكنه تعب نفسي أكتر من إنه جسدي.
2. مزاجك سيء طول الوقت
أو حتى لفترات متقطعة، بس تكرار وجودك في مزاج سيء ويقعد كده فترات طويله ده مؤشر على الاكتئاب.
3. عدم التركيز
لو لقيت نفسك مش قادر تركز في موضوع معين أو في الشغل ده معناه إنك نفسيا مش سليم وإن حالتك النفسية مأثرة على قدرتك على التركيز.
4. النسيان
طبيعي أننا ننسى بعض الحاجات سواء مواعيد أو أسماء، لكن لو لقيت الموضوع تطور معاك وبقيت تنسى أكتر من الأول ده مش حاجة كويسة.
5. تغير الوزن بشكل سريع
لو لقيت نفسك بتخس بسرعة أو بتتخن بسرعة وشهيتك اختلفت ده معناه أن حالتك النفسية مأثرة عليك، في ناس مع الاكتئاب شهيتها بتقل جدا، وناس تانية بتحط زهقها في الأكل.
6. صحتك ليست جيدة
لو لقيت نفسك بتعيا أكتر من الأول ولما بتعيا بتقعد فترات أطول، ده معناه إن حالتك النفسية مأثرة على المناعة بتاعتك، فبتخلي مقاومتك للتعب والمرض أقل كتير.
7. لا يوجد ما يسعدك
حتى الحاجت اللي متعود تعملها عشان تبقى مبسوط مبقتش تبسطك، وصعب جدا تغير مزاجك للأفضل، حتى لو اتغير بيقعد فترة قصيرة جدا وترجع لنفس مزاج الزهق.
8. لا تستطيع النوم بشكل طبيعي
يا أما بتصحى كتير أثناء النوم أو بتقعد فترة طويلة لحد ما تنام حتى ولو كنت تعبان جسديا، ده معناها إن فيه اضطراب وإنك مش مستقر.
9. الشعور بأنك لا تفعل شيئا مفيدا
دايما حاسس أن أي حاجه بتعملها مش مفيدة سواء ليك أو للمجتمع اللي حواليك، إحساس إن الحاجات اللي بتعملها بدون قيمه دي من أسوأ الحاجات اللي ممكن تحصل لك لأنها بتوصلك للنقطة اللي بعدها.
10. الشعور بعدم الرغبة في الحياة
إحساس إن مش بس الحاجات اللي بتعملها مش مفيدة، لأ كمان إنت نفسك مش مفيد في الحياة وإنك مش شايف سبب لوجودك، وده من أخطر المراحل لأنه لا قدر الله بيوصل للاكتئاب المزمن.
- لو لقيت علامة من الحاجات دي عندك حاول بسرعة إنك تغير الجو اللي حواليك وحاول تبقى وسط ناس مزاجهم إيجابي ويقدروا يطلعوك من المزاج السيء ده، وغير من طريقه حياتك وعاداتك الروتينية اللي ممكن تكون بتسبب لك الإحساس ده.
