صيدلية توفر دواء مجانياً لغير القادرين.. وبخصم للقادرين: كله هيتراضى

11:34 م | الأحد 12 أغسطس 2018

«الدواء مجانى لمن لا يستطيع».. لافتة يضعها ياسر مرزوق، صاحب صيدلية بمنطقة عزبة النخل، حيث قام بتوفير العلاج بالمجان لغير القادرين، سواء من أهل المنطقة أو خارجها، وكذلك يقوم بعمل خصم 20% للقادرين الذين يترددون على الصيدلية باستمرار، لمساعدتهم فى شراء الدواء دون تأجيله، خصوصاً بعد الارتفاع الباهظ لأسعار الدواء، وتعثر البعض فى شرائه.

رغم أن الصيدلية لها فروع كثيرة بمنطقة الجيزة، فإنه خصص هذا الفرع الذى تم افتتاحه منذ شهر، كمساعدة منه للأهالى على شراء الدواء: «باطلع على الروشتة والتقارير الطبية بتاعة كل مريض بيدخل لى الصيدلية عشان أقدر أتحقق هو يستحق ولا بيجور على حق غيره».

التقدير الشخصى لـ«ياسر» هو الفيصل فى حجم الخصم الذى سيحصل عليه المريض: «فيه ناس بتاخده من غير فلوس خالص، وكل ما يخلص لازم أبعته لهم على البيت لو مقدروش ييجوا، وفيه ناس باعمل لها خصم 50% أما أى حد عادى بيدخل الصيدلية فهو إجبارى له 20% خصم».

يقتطع «ياسر» جزءاً كبيراً من وقته، للحديث مع أهالى المنطقة، يقول لهم إن طلب الدواء المجانى ليس خجلاً إنما هو حق من حقوقهم: «كل مريض عايز يتعالج وأنا عندى صيدلية ومقتدر حقه عليّا إنى لازم ماخدش منه فلوس لحد ما يتم شفاؤه على خير، دى من أساسيات المهنة، لازم نحس بالمريض».

يقوم «ياسر» بحصر بعض الحالات المريضة فى بعض المناطق والقرى الفقيرة، ويقوم بإرسال الدواء المناسب لحالتهم: «مش دايماً طول الوقت بابقى فاضى، لكن الوقت اللى متاح ليّا باخليه للناس الغلابة اللى مش قادرين يجيبوا علاجهم».