عرائس يوفرن الميزانية: إحنا الـ«ميك - أب أرتست»

12:56 ص | الجمعة 10 أغسطس 2018

ارتفاع أسعار «الميك أب أرتست»، جعل بعض العرائس تستغنى عنها فى مقابل عمل مكياج بنفسها، لتوفير التكلفة والظهور بِطلّة مختلفة بدون تكلف، رباب مجدى، 20 عاماً، حبها للميك أب وأدوات التجميل والموضة جعلها تقبل على تلك الخطوة بكل جرأة، ودون خوف من النتيجة: «عملت الميك أب عند كوافير فى الخطوبة وكانت التجربة وحشة جداً لأنها طلّعتنى واحدة تانية مش أنا»، بروفات وتجهيزات مختلفة قامت بها «رباب» حتى استقرت على الشكل النهائى للميك أب، وطمأنها إعجاب أسرتها وزملائها الشديد بشكلها: «كلهم أجمعوا إن الاستايل حلو جداً وشيك، الكل انبهر بشكلى وكتير حاولوا إنهم يقلدونى»، ولم تتعد التكلفة، بحسب قولها، 1000 جنيه. واعتمدت «رباب» على الطرحة التل والريش فى عمل لوك مميز: «الطرحة كلفتنى 60 جنيه وعملت عليها بروفة أكتر من مرة لحد ما وصلت للوك المناسب بالنسبة ليّا».

بتحدٍّ، قررت سارة سراج، عمل الميك أب الخاص بحفل خطبتها، والذى كان سبباً فى «فتحة الخير عليها»، حيث أصبحت فيما بعد ميك أب أرتست: «اشتريت كل الماتريال المناسبة لتنفيذ لوك هادى وحاولت أكون مختلفة أحافظ على ملامحى زى ما هى». تدربت «سارة» على الطريقة الصحيحة لعمل الميك أب عن طريق مشاهدتها لبعض الفيديوهات التعليمية على موقع «يوتيوب»: «كنت الأول مليش فى الميك أب، لكن اتعلمت وبقيت محترفة وأعرف أذوق أى عروسة». لم يكن هذا اليوم نقطة تحول فى حياتها الخاصة فقط ولكن العملية أيضاً: «من ساعتها وأنا بمكيج كل صحباتى، وبقى ليا زبائن وبقيت ميك أب أرتست».

التجربة نفسها عاشت تفاصيلها، أميرة محمد، عند عملها الميك أب الخاص بحفل «كتب كتابها»: «كان بسيط ورقيق وأهل جوزى عجبهم وأشادوا بشكلى فى اليوم ده». 400 جنيه هى تكلفة ميك أب «أميرة»: «اللى زود الفلوس تكلفة الرموش، لأنها كانت غالية وأنا كان نفسى فيها واستفدت بكل أدوات الميك أب بعد جوازى ووفرت تكاليف كتير إحنا أولى بيها».