بريد الوطن| مليون أيّوه
بريد الوطن| مليون أيّوه
أيوه ومليون أيّوه
مكتوبلى أدوب وأتوه
من بحرى لحد استانلى
ولا شفتش حتَّى أخوه
والكف بيحضن كفى
والعين ف العين بتدفى
والرقصة فراشة فى نوره
بتزن لموتها ياهوه
ارقص طلعنى لفوق
من خمر الشفة بفوق
درويش موصوفله جنونك
ومريد ف الجنة رموه
على بحر الشوق ف وصالك
الموج بيشيلنى وشالك
شال منى الحشمة وخلّى
الشوق يسبقنى شابو
ع الشط فردت قلوعك
والصيف زغللى ربيعك
والننى بدمعى راوينى
وشاددنى لبحره بتوه
وف كعبة حبك دايرْ
أشواطى السبعة بشاير
ف القلب أتوضى بنارك
والحاير مين يهدوه
أيوه ومليون أيّوه
من بحرى لحد استانلى
ولا شفتش حتَّى أخوه
سامح لطف الله
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
