معتزة مهابة: عمرو سليم شخصية مرموقة.. وما أقدرش أمحي تاريخه

11:54 ص | الأحد 15 يوليو 2018

استنكرت الإعلامية معتزة مهابة، مُقدمة برنامج "لقاء السبت"، الذي يُذاع عبر محطة "9090"، الانتقادات الموجهة لها، بعد وصفها لرسام الكاريكاتير عمرو سليم، خلال حلقة أمس، بـ"المرموق".

وقالت مهابة، عبر حسابها الشخصي على موقع "فيس بوك": "أشك اللي بينتقد إنه سمع الحلقة.. ثانيًا أنا مواطنة مصرية قبل ما أكون إعلامية موضوعية في حكمي على الأمور بمعنى إني أقدر أفرق كويس قوي بين اللي تآمر على البلد واتمول وده خائن حقير، واللي كان مفهومه ورؤيته مختلفة عني وبيسعى للتغيير وده حقه ما أقدرش ألومه أو أعاقبه عليه، خاصة إذا كان أدرك فيما بعد المخاطر اللي بتهدد البلد ووقف معاها".

وأضافت: "أما كوني إعلامية فأنا أزعم إني مهنية بشهادة فطاحل الإعلام ومتحيزة لبلدي بكل المقاييس وأحترم وبشدة كل ضيوفي مهما اختلفت وجهة نظرنا، وبسعى دائما وبجتهد إني أقدم كل ما هو مفيد للمستمع الكريم"، متابعة: "الأهم بقى مش كوني أختلف مع ضيف في وجهة نظر إني أقلل من شأنه وأمحي تاريخه علشان أسعد حضرتك، بمناسبة إني بتلام لقولي على الفنان عمرو سليم مرموق".

وأكدت مقدمة البرنامج: "أنا شخصيتي كده وده تفكيري ومقتنعة بنفسي كده والحقيقة إني مش هعمل أي مجهود علشان أتغير وحضرتك، مع احترامي الشديد لك، تبقى سعيد.. أنا اللي بيحكمني ضميري المهني والأخلاقي وبس".