مشروع تخرج «بسمة»: بورتريه من 1800 «شاليمو» بتكلفة 200 جنيه

08:48 م | الاثنين 02 يوليو 2018

اعتادت فنون النحت على الطين والحجر والخشب، لكن حرصها على تقديم عمل مميز كمشروع تخرج جعلها الأولى التى تنفذ نحت بورتريه باستخدام «الشاليمو»، لتثبت بذلك جدارتها لدخول الكلية وإكمال دراستها الجامعية رغم معارضة أهلها فى بادئ الأمر.

بسمة عطية، 22 سنة، طالبة فى السنة الأخيرة فى كلية تربية نوعية بجامعة الإسكندرية، استخدمت فى مشروعها أكثر من 1800 شاليمو، وعكفت عليه لمدة 6 أيام متواصلة: «كنت بشتغل 16 ساعة فى اليوم، عشان ألحق أخلّص قبل ميعاد لجنة المناقشة والتقييم».

لم تتوقع «بسمة» انبهار زملائها بالمشروع ومديح أساتذتها: «كنت رايحة المناقشة محبطة، خاصة إن فى البيت مكانوش فاهمينها وناس اتريقت عليها كتير، لكن إعجاب الزملاء والدكاترة حسّسنى بقيمة اللى عملته».

مقص، آلة تقطيع «كاتر»، وغراء.. هى الأدوات التى استخدمتها «بسمة»، لإخراج البورتريه فى صورته النهائية: «جرّبت كتير فى الأول عشان أقدر أتحكم فى الخامات قبل ما أبدأ فى تنفيذ البورتريه، والشاليمو اللى استخدمته هو لونه أسود فى الأصل مش مرشوش، ودوّرت عليه كتير لحد ما لاقيته».

لم يتكلف المشروع الحائز على تقدير امتياز سوى 200 جنيه فقط. تحلم الفتاة العشرينية بامتلاك جاليرى يعرض منتجات تصنعها وتصممها بنفسها، ويشكل مساحة حرة لكل أصحاب الفنون والفكر المختلف الذين يحرصون على الدمج بين الأفكار والعناصر والخامات المختلفة.