بريد الوطن| متمرمط
بريد الوطن| متمرمط
أنا طلعة واحد متمرمط
أنا غايب لأ لأ مش حاضر
أنا صفحة ومنسية تماماً
أنا كلمة خلعت معناها
أنا وردة ودبلت ورقتها
بتدور على مين رواها
أنا نبضة والقلب فايتها
وتركها جوة الشريان
أنا حسرة وزمنها نسيها
أنا كلمة كترت معانيها
فى العقل بتسكن أركان
أنا تايه فى البحر لوحدى
والبوصلة سرقها الربان
أنا غيمة وف وسط سحابة
أنا أرنب وف وسط ديابة
أنا قفل ف إيد السجان
أنا حابس نفسى فى زنزانتى
أنا حافظ شرفى وأمانتى
أنا عايش رغم الأحزان
ليه خطوة بخطوة بتتبعنى؟
ليه زمن الرخص قوام باعنى؟
والدنيا الواسعة ما بتساعنى
ليه تسرق قوتى وتفجعنى؟
أنا مش هسكت زى زمان.
سامح لطف الله
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
