السفير البريطانى لـ«الوطن»: مفيش أحسن من شهر رمضان علشان أخرج وأكون مع الناس.. وباستناه من السنة للسنة

10:24 م | الجمعة 01 يونيو 2018

بعد قضائه ثلاث سنوات فى مصر، تطبع السفير البريطانى فى القاهرة جون كاسن بعادات المصريين وحتى بلغتهم أيضاً، مما جعله متفاعلاً كثيراً مع المصريين فى الشارع وعلى وسائل التواصل الاجتماعى، ويقول «كاسن»: «أستمتع بشهر رمضان على الطريقة المصرية، بحب أروح الحسين بيكون فيه ناس من مناطق مختلفة متجمعين والشارع مليان زينة وفوانيس، وتكون فرصة للمة الأهل والأصحاب ووقت مميز بشوف فيه الناس يمارسوا الطقوس الدينية والحضارية وبيشاركوها مع غيرهم، والناس بتكون متعاطفة ومتسامحة مع بعضها. عموماً، بحب الجو المختلف بتاع رمضان. زمايلى فى السفارة دايماً كرماء وبيعزمونى أفطر معهم ومع عائلاتهم».

وأوضح السفير فى حوار لـ«الوطن» أن السفارة هيئة بريطانية - مصرية وكثير من العاملين فيها مصريون، ولذلك نحب نتشارك فى فعل الخير، وقال السفير الذى فضل التحدث بالعامية وليس الفصحى «السنة اللى فاتت عملنا حملة واتبرعنا بالدم قبل شهر رمضان، وعملنا كمان فطار لينا هنا علشان نتجمع كلنا. السنة دى أول يوم رمضان فطرت مع فريق الأمن فى السفارة وأكلنا كل اللى قلبك يحبه، رقاق وبط ومكرونة بالبشاميل وأم على. والجميل أن زميلتنا المسيحية هى اللى كانت عاملة الأكل ووالدها هو اللى جاب الأكل لينا قبل الفطار، ويمكن هو ده اللى بنشوفه وبنفرح بيه فى رمضان، القيم الأصيلة فى المجتمع».

{long_qoute_1}

ويفضل كاسن «الشكشوكة» كثيراً و«الكشرى» من عند «أبوطارق»، وفى شهر رمضان يفضل تناول عصير قمر الدين والقطايف.

وبين السفير جون كاسن الفرق بين عادات المسلمين فى بريطانيا عن مصر، وقال «فى مسلمين كتير فى بريطانيا من دول مختلفة من العالم العربى وشمال أفريقيا والهند وباكستان مثلاً. وبيكون عندهم عادات وتقاليد ليهم فى رمضان فبنشوف وجوه كتيرة للشهر. رؤساء الوزراء بيعملوا إفطار سنوى كل رمضان وبيهنّوا فيه الجالية المسلمة فى بريطانيا. وكمان فى جامعات بريطانية زى جامعة SOAS مثلاً واللى بتعمل إفطار يومى للمسلمين وغير المسلمين علشان ياكلوا عيش وملح ويكسروا صيامهم مع بعض».

وتابع «طبعاً فى حاجات متشابهة زى التمر والحلويات فى محلات الأكل لكن مفيش فوانيس. بس التمثيل المصرى موجود فى حاجات ثانية. طلبة منحة تشيفيننج مثلاً بيعملوا عزومات لبعض وبيطبخوا الأطباق المصرية الرمضانية».

وقال السفير البريطانى الذى يفضل الذهاب للأماكن المختلفة فى مصر «بحب أروح فى منطقة الحسين خاصة السنه دى، لأن والدى زارنى وكان أول مرة يقضى وقت فى رمضان فى مصر، ورحنا الخيامية وتجولنا فى الشوارع علشان نتفرج على الزينة وجامع الأزهر، وحب يتعرف على الناس ويعرف عن فريضة الصيام وهم ليه بيصوموا. ودورنا على بياع كنافة بس للأسف مالقيناش. كان نفسى أشوف بياع الكنافة فى الحقيقة. أنا بشوفه بس فى التليفزيون، بس بكل صراحة أحب مكان لقلبى بيبقى فى بيوت أصدقائى وعائلاتهم. بشوف كرم الضيافة المصرى اللى دايماً بيرحبوا بيا».

{long_qoute_2}

وحول الفرق بين أول رمضان قضاه فى مصر ورمضان الآن، قال كاسن «لما وصلت مصر فى 2014 كنت لسه باتعرف على الدنيا بتمشى إزاى وكان فى الناس بتنصحنى أقضى رمضان فى بريطانيا لأن الناس بتكون تعبانة بس اللى أنا اكتشفته أن رمضان من أفضل الأوقات أنى أكون فى مصر. أنا بشوف أن العلاقات الدبلوماسية بتكون بره أبواب السفارة ومفيش أحسن من شهر رمضان علشان أخرج وأكون مع الناس. فدلوقتى أنا باستناه من السنة للسنة».

وختم السفير حديثه بأن أصدقاءه رشحوا له مسلسل «اختفاء» للفنانة نيللى كريم، ولكنه لم يشاهده حتى الآن، ومسلسل «الوصية» لأحمد أمين وأكرم حسنى.