مسحراتى اليوم السادس عشر
صورة أرشيفية
أنا صنعتى مسـحراتى فى البلد جوال
حبيت ودبيت كما العاشق ليالى طوال
وكل شبر وحتة من بلدى
حتة من كبدى
حتة من موال:
مسحراتى
منقراتى
نيلى فراتى
أشرب زُلال
واقرا وردى
وأرعش يا ولدى
من تحت جلدى
فى الابتهال
تبارك الله ذو الجلال
الله رحيم
إن كنت باطمع
فى عينى يلمع
نور النعيم
وبودنى أسمع
أدان بلال
تبارك الله ذو الجلال
الله ودود
أحب وطنى
من غير حدود
وانقّى قطنى
من كل دود
وآخد فى حضنى
كل العيال
تبارك الله ذو الجلال
الله لطيف
تغنينى لقمة
من الرغيف
عن جنس لؤما
وانا الضعيف
من أجل حكمة
أشيل جبال
تبارك الله ذو الجلال
أشيل جبال
وآخد فى حضنى
كل العيال
واسمع بودنى
أدان بلال
طريقى خالى من الضلال
حالف ما اخاوى
إلا الحلال
كل الخطاوى
على كل حال
حتنحسب لى
المشى طاب لى
والدق على طبلى
ناس كانوا قبلى
قالوا فى الأمثال
الرجل تدب مطرح ما تحب