الفانوس المصرى يتحدى الصينى بـ«سبونش بوب»: الكبير كبير

10:45 م | السبت 21 أبريل 2018

المنافسة بين الفانوسين المصرى والصينى كادت فى فترات سابقة أن تحسم لصالح «الصينى»، باعتباره شبيهاً للدمى الأكثر جذباً للأطفال، فى مقابل شرائح عمرية أكبر تفضل الفانوس الصاج التقليدى، الأمر الذى حاول صناع الفانوس المصرى التمرد عليه هذا العام، بعقد ورش عمل لإنتاج أشكال جديدة من الفوانيس تنافس «الصينى» فى الشكل والتكلفة، شارك فيها شباب وسيدات من المنزل.

يحكى ممدوح فاروق، تاجر فى باب الخلق، عن محاولة عدد من التجار إنتاج فانوس مصرى بجودة تفوق ما كان عليه فى السنوات الماضية: «قلنا لازم نضرب الألعاب الصينى الموجودة فى السوق، فعملنا ورش شغل، شارك فيها شباب وأطفال وستات فى البيوت بأقل الإمكانيات، اللى يغلف واللى يعمل السلك، وناس تزخرف وتزين.. وهكذا، وده ساعد فى ضخ كميات أكبر، وخلق شغل لناس كتير زى نظام الأسر المنتجة».

{long_qoute_1}

الميزة الأكبر بحسب «ممدوح» من النهج الجديد، هو تقليل تكلفة الفانوس: «زمان كنا بنعتمد على السمكرية لإنتاج الفانوس الصاج، وكانت تكلفته أكبر، وبالتالى سعره غالى على الزبون، لكن دلوقت الأسعار بترضى الجميع»، مشيراً إلى أنها تبدأ من 15 جنيهاً وتصل لـ200 جنيه.

«لعبة بتنور وتتكلم، ويقولوا عليها فانوس»، يقولها محمد سليمان، تاجر فى شارع الموسكى، مندداً بالفانوس الصينى، موضحاً أن التجار فى مصر بدأوا يحاكون الفوانيس التى تشبه لعب الأطفال، بإنتاج فوانيس مصرية بأشكال جديدة، مطبوع عليها رسومات كارتونية مثل «اسبونج بوب، بوه»: «أحلى من الصينى وبأسعار معقولة، بتبدأ من 5 جنيه، وبتوصل لـ35 جنيه زى فانوس اسبونج بوب».

على طاولة كبيرة فى درب البرابرة، وقف أحمد إبراهيم أبوحبيبة يرص الفوانيس المصرية التى شارك فى تصنيعها، متوقعاًَ أرباحاً مرتفعة هذا الموسم: «من ساعة ما منعوا استيراد الفانوس الصينى، والباب اتفتح للسوق المصرى، وإحنا بقينا نشتغل ونطور ونطلع أشكال جديدة، الفانوس المصرى منه الغالى والرخيص، لكن الصينى بنعتبره لعب أطفال. أصل مش عشان بيغنى وحوى يا وحوى نقول عليه فانوس».

لمصطفى عليوة، الذى يبيع الفوانيس فى الموسكى، رأى مختلف: «فيه منتج مصرى كويس، لكن الصينى مميز أكتر لأن له أشكال كتيرة زى اللعب وبتجذب الأطفال»، ويتفق معه محمد أبوشنب، صاحب فرشة فى ميدان العتبة، مؤكداً أن هناك إقبالاً جيداً على الفانوس الصينى: «بيعملوا أشكال جذابة زى طمطم، وأرنب، وفيه اللى بيغنى وينور، فبيفرح العيال، وناس كتير بتفضله».

ويستعرض «محمد»، على فرشته، أشكالاً جديدة للفانوس الصينى: «عندى فانوس جمل وسعره 100 جنيه، وزبونه مصرى وعربى كمان، أما باقى الأسعار فتتراوح من 60 لـ150 جنيه، وفيه فانوس بلاستيك صينى زى الصاج المصرى بـ60 جنيه عشان اللى بيحبوا شكل الفانوس التقليدى».