فكرة شبابية تحول عشة فراخ إلى محل «بلاى ستيشن»

08:41 م | الجمعة 30 مارس 2018

مقاعد عبارة عن إطارات سيارات ملونة، كنبة مصنوعة من بالتات الخشب، نجف من المواسير القديمة مغطى بقفص فاكهة خشب، رائحة ذكية تفوح من المكان، وألوان مبهجة فى الأركان، هكذا تحولت عشة فراخ فوق أحد أسطح العقارات القديمة فى العمرانية الغربية إلى مكان ترفيهى للعب «البلاى ستيشن»، وهو المشروع الذى افتتحه مجموعة من الشباب قبل أسبوع، أحدهم محمود أكرم، مهندس، وهو صاحب الفكرة: «صاحب المشروع كان معاه فلوس قليلة يادوب يكفوا الأجهزة، فكان عايز يقلل التكاليف ويفرش بفلوس رخيصة، فقعدنا مع بعض، واقترحت عليه الفكرة وعجبته».

وحسب محمود سيد، الشهير بـ«روسيا»، صاحب المشروع، فإنه نفّذ الفكرة بمساعدة صديقه رغم الانتقادات التى تعرّضا لها فى البداية: «عملنا كل شىء من الألف للياء بنفسنا، مفيش صنايعى مد إيده معانا، حتى الدهان اللى على الطوب الأحمر جبت أورة بـ١٣ جنيه، والعيال اللى فى الشارع كل واحد مسك علبة وبقى يلعب ويدهن خشب المحل كله»، مؤكداً أنه اشترى الكاوتشات بنصف جنيه، وقام بتنجيدها بأعلام الكرة والقماش: «مافتكرش إن فيه كرسى وترابيزة، تكلفة الواحد منها ٣٠ جنيه دلوقتى».

وعبّر «روسيا» عن فرحته بسبب ردود الفعل الإيجابية، وإقبال أهالى المنطقة على مشروعه البسيط: «الناس اللى انتقدوا الفكرة فى البداية رحّبوا بيها لما شافوها واعتبروها مكان ترفيهى يقضى فيه الشباب وقتاً ممتعاً».