«مسعد» وأصدقاؤه من طنطا: بناكل 3 وجبات فول وطعمية عشان نصمد وأغلب الأيام مابنامش
مجموعة من العمال بالموقع يأكلون أكلتهم المفضلة «فول وطعمية وبطاطس»
على عمود خشبى، يجتمع مسعد أسعد، أحد الأيادى المصرية التى تعمل بمشروع «جامعة الملك سلمان»، الذى جاء من طنطا، مع مجموعة من العمال بالموقع، يأكلون أكلتهم المفضلة «فول وطعمية وبطاطس»، قبل مغيب الشمس على موقع البناء، لاستكمال أعمالهم بالمشروع الضخم، حسب «مسعد» (54 عاماً): «إحنا تقريبا مابنامش، بناكل فول وطعمية فى الفطار والغدا والعشا، يعنى الـ3 وجبات كلهم، عشان نعرف نصمد، كل يوم بنقعد القعدة دى، منها نرتاح شوية وناكل عشان نعرف نكمل شغل، لأننا من العمال اللى قاعدين وبننام فى الموقع، عشان محافظتنا بعيدة، وبننزل إجازات لو متاح لينا ناخدها، بس مبسوطين الحمد لله للشغل هنا، وحاسين بإنجازه، والمشروع موفر لينا مكان ننام فيه، وعربيات بتنزلنا كمان لمحافظتنا وقت الإجازات».
إحنا حاسين بقيمة المشروع رغم إننا مش من أهل سيناء
حالة من الإصرار والتحدى يعيشها «مسعد» وأغلب العمال بالموقع، بحسب قوله، لإنجاز المشروع فى الوقت المحدد: «إحنا حاسين بقيمة المشروع رغم إننا مش من أهل سينا وممكن عيالنا ميدخلوش الجامعة وتبقى بعيدة عليهم، لكن المشروع نفسه يستحق نشتغل فيه لإننا كلنا مصريين ولو عيالنا ماستفادوش منها، غيرنا عياله هتستفاد، ودى حاجة كويسة لبلدنا، ومش كل إنجاز يطلع للنور يبقى هو المهم، فيه إنجازات ومشاريع صغيرة محدش يعرف عنها حاجة، لكن فعلاً هى فى الحقيقة كلنا بنستفيد منها، ولازم الناس تبقى عارفاها».