بريد الوطن| واحد صحيح!!
بريد الوطن| واحد صحيح!!
هاتلى شىء واحد صحيح من غير كسور
بس مايكونش اعتيادى
وم التعود اترمى ف آخر الطابور
وكل ما يقرب لشباك أنانيتك
يمكن تناوله تذكرة تسمح لحلمه بالمرور
تزقه تانى ترجعه.. وتوجعه وتقوله لسه ملكش دور
هاتلى شىء واحد صحيح يكون صريح من غير رتوش
ولا صبغة باهتة ع الوشوش وعند أول مشكلة يدوب يبوش
ويبان لنا وش الحقيقة المستخبى
اللى عشنا العمر واحنا منعرفوش
وشها المر القبيح يصرخ يصيح
معدش بينا شىء صحيح
حتى هوانا اللى اتولد واضح صريح
اللى كان واقف جبل ما تهزه ريح
بقى جزء من مليون صفر جنب منه ع الشمال
بقى كسر عادى واحتمال ممكن يموت
ممكن يطاطى عشان يعيش
نجلاء نعيم
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
