المدخنون غاضبون من ارتفاع الأسعار.. وبائعون: التجار سبب الأزمة

10:09 م | الأربعاء 22 نوفمبر 2017

سادت حالة من الغضب بين المواطنين بسبب ارتفاع أسعار السجائر والمعسل وعدم وجود رقابة على أصحاب الأكشاك، ما جعلهم عرضة لاستغلال التجار الذين يبيعون السجائر بأسعار متفاوتة، وفقاً لرغبتهم دون التزام بقرارات الحكومة الخاصة بزيادة الأسعار بدءاً من اليوم. {left_qoute_1}

وأوضح طارق بركات، 41 سنة، مندوب بمكتب وسائط تأمين: «أشترى دايماً سجاير ونستون الحمراء، وكنت بشتريها بـ21 جنيه، وهى لسه مغليتش، لكن من ساعة ما السجاير غليت بلف على علبة ميريت صفرا ومش لاقيها وسعرها وصل 35 جنيه بعد ما كانت بـ30 جنيه، لأن التجار وأصحاب الأكشاك بيخبوها ويخزنوها، عشان يعطشوا السوق، ويبيعوها بالغالى»، وأشار إلى أنه لا يعلم سبب هذا الارتفاع المفاجئ فى أسعارها ما يعرضهم لجشع الباعة، ويضيف: «مش عارف غليت ليه بس الحكومة، قالت إنها هتغلى جنيه ونص أو 2 جنيه، لكن فى الحقيقة ده مش موجود، وكله بيغلى بمزاجه».

وأضاف محمد سعيد، 30 سنة، أنه يجد النوع الواحد من السجائر بأسعار متفاوتة على حسب المنطقة، على حد قوله: «فيه سجاير بلاقيها بسعرها العادى فى مناطق، وفى مناطق تانية بلاقيها أغلى، يعنى مثلاً لو دخلت كارفور والمولات الكبيرة هجيب العلبة بسعرها العادى قبل الغلاء، لكن لو دخلت كشك أو أى محل بقالة ممكن أجيبها بزيادة 5 أو 6 جنيه، فمثلاً سجاير إل إم الحمراء لقيتها امبارح فى الأكشاك بأسعار مختلفة من 28 لـ29 جنيه، وهى أصلاً تسعيرتها 21 جنيه».

سامى سعد، 60 سنة، موظف بشركة مصر للتأمين، «أنا ما بشربش غير «إل إم أحمر»، وللأسف زادت مع باقى الأنواع حتى السجاير المصرية»، وتابع يقول: «كليوباترا» كنا بنجيبها بـ13 أصبحت بـ16 جنيه، ده غير إنى مابلاقيش سجاير، إل إم، لأن كل الأكشاك خزنوا اللى عندهم عشان يغلوها علينا، فلازم يبقى فيه رقابة على الأسعار زى باقى المصنفات، عشان ما يحصلش استغلال».

وأوضح مدخنو «المعسل» أن سعره كما هو، لكن الكمية أصبحت أقل عن ذى قبل، وحسب ما أوضحه أحمد ممدوح، 36 سنة، قائلاً: «بشرب معسل قص فقط، وبجيب العبوة الصغيرة بـ10، والكبيرة بـ20، فالمعسل ما زودوش فى سعره، لكنهم قللوا الكمية بعد ما كنت بجيب العبوة 800 جرام بـ20 جنيه بقيت دلوقتى بشترى الـ300 جرام بـ20 جنيه، وفى بعض المقاهى الحجر بـ2.5 و3 جنيه». وقال محمد على، 29 سنة: «بشرب معسل سلوم دايماً على القهوة بـ3 جنيه للحجر، ولو المسئولين غلوه علينا مش هتفرق، لكن المهم الأكل والشرب ما يغلاش علينا، لأنهم من أساسيات الحياة».

وأكد محمد فرغلى، 27 سنة، صاحب كشك بالدقى أن هناك أنواعاً معينة من السجائر ارتفعت بشكل كبير، مثل «مالبورو أحمر وميريت»، والشركة تبيع الخرطوشة بـ298 جنيه، وتجار الجملة بيبيعوها بـ345 جنيه، و«إل إم» بينزل من الشركة بـ225 جنيه، لكن دلوقتى التجار عارضينها بـ265 جنيه»، لافتاً أن أصحاب الأكشاك يضطرون لرفع أسعار السجائر والمعسل القص، بسبب سعر التجار المبالغ فيه على حد قوله، مضيفاً: «تجار الجملة هما اللى بيكسبوا لأنهم مزودين علينا نحو 50 أو 60 جنيه فى الخرطوشة، رغم أن السلع ما غليتش رسمى، والزيادات أجبرتنى أجيب كميات أقل واشتريت من كل نوع خرطوشة فيها 10 علب، عشان أمشّى نفسى».

وأوضح «فرغلى» أن هناك أنواع سجائر لم يرتفع سعرها، مثل «روزمان وونستون»، بينما «مارلبورو وكليوباترا» زاد السعر بشكل كبير، وعلبة «كليوباترا» أصبحت بـ16 جنيهاً و«البوكس» بـ17، و«إل إم» بـ31، و«المارلبورو» بـ35، فالزيادة تتراوح من 3 إلى 5 جنيهات.