5 طلاب يروجون للسياحة بفيديوهات: تعرف إيه عن تاريخ مصر؟

08:25 م | السبت 21 أكتوبر 2017

الإيمان الشديد بأهمية تنشيط السياحة، هو ما دفع 5 طلاب من كلية الآثار، جامعة الفيوم، إلى تصوير مقاطع فيديو، لبعض المناطق الأثرية، فى محافظات مصر، حتى يتعرّف المواطنون عليها، وبجهودهم الذاتية بدأوا حملتهم التى اتخذوا لها شعار «رحلة فى صورة»، وزاروا مواقع مختلفة، منها رحلات نيلية، وشوارع أثرية، ومتاحف مختلفة. فيقدّمون شرحاً وافياً لتاريخ وأهمية تلك الأماكن.

اعتادت المجموعة أن تجتمع أسبوعياً لتحديد مكان التصوير والتحضير والإعداد لليوم، وهو ما أكده أحمد مجدى، أحد معدى الفيديوهات: «الناس دلوقتى مابقيتش تهتم بالتاريخ، فإحنا بنحاول نوصّل لهم معلومات بطرق بسيطة وسهلة».

«الفيوم، بنى سويف، القاهرة، إسكندرية، طنطا».. جانب من بعض المحافظات التى قام بزيارتها الـ5 طلاب، واختاروا أن تكون الفيديوهات قصيرة، حتى لا يشعر المتلقى بالملل، وتقدّم بشكل مبسّط فى صورة سؤال وجواب عن بعض المعلومات الخاصة بالمكان الموجودين فيه: «إحنا حاولنا نستفيد من دراستنا والمعلومات اللى عندنا، وبنحاول نفيد غيرنا، وأملنا الوحيد أننا نلاقى داعم لينا علشان المصاريف تقيلة عندنا، واحنا لسه طلبة».

يتفاعل الشباب مع المارة فى الشارع من خلال طرح بعض الأسئلة التاريخية عليهم: «الناس مابتكونش عارفة أى معلومات ولو بسيطة عن آثار بلدها وتاريخها، فبنبتدى نجاوبهم إحنا، والموقف ده بيفكرهم وتثبت المعلومة».

يقومون أيضاً بالتصوير مع أجانب، ومشاهدة ردود فعلهم عن الآثار المصرية: «ده بيشجع الناس أكتر أنها تنزل تشوف وتتعرّف على المعلومات الأثرية». ويقوم الشباب بالتجهيز لفعالية ثقافية عن الآثار فى بعض الجامعات خلال الفترة المقبلة.