بلاغ لـ«البيئة» يطالب بـ«حرية بجعة»

10:19 م | السبت 30 سبتمبر 2017

بجعة مقيّدة من قدميها ومربوطة أمام محل أسماك شهير بمدينة رأس سدر فى محافظة جنوب سيناء، مشهد اتّخذه صاحب المحل وسيلة للدعاية، لكن المارة استاءوا منه واعتبروه انتهاكاً لحقوق الحيوان، مما دفع بيشوى فايز، 31 عاماً، إلى تصويرها وإرسالها مرفقة بشكوى إلى وزارة البيئة مطالباً بالحرية للبجعة.

شعور «بيشوى» بما وصفه «خنقة البجعة»، جعله يسارع بتقديم شكواه عبر تطبيق الـ«واتس آب» على الرقم المخصّص لوزارة البيئة، وردّت الوزارة بتحديد رقم للشكوى وهو 108301، وأنه جارٍ متابعتها من خلال فرع محافظة السويس: «ماكنتش متخيل أن الوزارة هترد بسرعة كده، كل شوية بادخل أتابع الشكوى وصلت لحد فين، بس للأسف كل شوية يقولوا لى جارى البحث، وأنا نفسى أخلّص البجعة من العذاب اللى هى فيه».

قبل تقديمه الشكوى، رفض «بيشوى» أن يخاطب صاحب المحل ويطلب منه فك قيدها: «أقل حاجة هيقولها لى مالكش دعوة، الناس دى بتبقى جايبة الحيوانات علشان تجذب بيها الزباين وتلفت انتباههم، وعمرهم ما يتخلوا عن كده أبداً»، لهذا قرّر أن يكتفى بتقديم الشكوى للوزارة وتصوير البجعة كنوع من توثيق شكواه: «أصحاب المحلات أحياناً مابيكونش فى قلبهم رحمة، ولا يفرق لهم الحيوان ده بيتعذب ولا لأ، ده حتى الكلب مابيكونش مربوط بالشكل ده، فما بالك ببجعة حياتها كلها فى الحركة وتحريك ريشها».